Աշոտյանի հրապարակած տեղեկությունները չեն հաստատվում․ հատ-հատ հրապարակեք դեպքերը․ վարչապետ

«Երեկ ԱԺ-ում Արմեն Աշոտյանի հրապարակած տեղեկությունները, թե հոկտեմբերի 2-ի երեկոյան հանրահավաքի ընթացքում ապակիներ են ջարդվել, մեքենաներ են վնասվել, միջադեպեր են եղել, չեն հաստատվում:

Առաջարկում եմ, որ պարոն Աշոտյանը հատ-հատ հրապարակի դեպքերը, որպեսզի ոստիկանությունը դրանք հետաքննելու հնարավորություն ունենա»,-իր ֆեյսբուքյան էջում նման գրառում է կատարել վարչապետ Նիկոլ Փաշինյանը:

Հիշեցնենք, որ ԱԺ-կառավարություն հարցուպատասխանի ժամին, դիմելով վարչապետ Նիկոլ Փաշինյանին, ՀՀԿ խմբակցության պատգամավոր Արմեն Աշոտյանը նշել էր, որ հոկտեմբերի 2-ին ցուցարարները հարձակվել են կին պատգամավորի վրա, վնասել են մեքենաներ:

Ավելի ուշ ՀՀ ոստիկանության լրատվական ծառայությունը ներկայացրեց պարզաբանում՝պատգամավոր Ռուզան Առաքելյանի վրա կատարված հարձակման մասին հայտարարության վերաբերյալ:

Վերջինս ոստիկանության ծառայողին հայտնել է, որ իր նկատմամբ բռնություն չի գործադրվել․ ընդամենը վեճ է տեղի ունեցել հավաքված կանանցից մեկի հետ։ Ինքն այդ մասին տեղեկացրել է նաև ԱԺ պատգամավոր Արմեն Աշոտյանին։

Շնորհակալություն է հայտնել ոստիկանությանը մտահոգության համար և խնդրել, որ այդ կապակցությամբ իրեն չայցելեն, ոչ էլ հրավիրեն ոստիկանություն։

Իսկ ՀՀ ԱԺ աշխատակազմի ղեկավարի տեղակալ Արսեն Բաբայանը ՀԺ-ին հայտնել էր, որ ցուցարարների կողմից ԱԺ ծառայողական մեքենաներ, ապակիներ չեն վնասվել: