ՀՀ եւ ՌԴ Քննչական կոմիտեների ղեկավարները պայմանավորվել են հետագա համագործակցության մասին

Ռուսաստանի Քննչական կոմիտեի ղեկավար Ալեքսանդր Բաստիրկինը եւ ՀՀ ՔԿ նախագահ Ավղան Հովսեփյանը Մոսկվայում կայացած հանդիպման ժամանակ պայմանավորվել են զարգացնել համագործակցությունը քրեական վարույթի ոլորտում, այս մասին չորեքշաբթի «ՌԻԱ Նովոստիին» հայտնել է ռուսական տեսչության պաշտոնական ներկայացուցիչ Վլադիմիր Մարկինը:

Նրա խոսքով, հանդիպման ժամանակ քննարկվել են փոխգործակցության ամրապնդմանը, Ռուսաստանի ու Հայաստանի ՔԿ վարույթում գտնվող քրեական գործերի գծով փոխադարձ իրավական օգնության արդյունավետության բարձրացմանը վերաբերող հարցեր:

«Հանդիպման արդյունքներով ձեռք են բերվել պայմանվորվածություններ ՝ քրեական վարույթի ոլորտում համագործակցության հետագա զարգացման վերաբերյալ»,- ասել է Մարկինը:

Հիշեցնենք, որ երկու երկրների Քննչական կոմիտեների համագործակցությամբ իրականացվող ամենաաղմկահարույց գործերից մեկն է Հայաստանում ՌԴ ռազմակայանի զինծառայող Վալերի Պերմյակովի գործը, ում մեղադրում են ՀՀ յոթ քաղաքացիների սպանության մեջ: Ավելի վաղ ռուսական քննչական մարմիններն այս գործի նյութերը փոխանցել էին ՀՀ իրավասու մարմիններին: