Մարդիկ պետք է սովորեն իրական ընտրություններին. Փաշինյանը քվեարկեց ու մեկնեց Նյու-Յորք

Մարդիկ պետք է սովորեն իրական քարոզարշավի ու իրական ընտրություններին, և բոլոր ուժերը հասկանում են, որ պետք է պայքարեն ամեն քվեի համար և իշխանությունը պետք է վերցնեն։

Այս մասին հայտարարել է ՀՀ վարչապետ Նիկոլ Փաշինյանը լրագրողների հետ զրույցում քվեարկելուց հետո` խոսելով Երեւանի ավագանու ընտրությունների մասին:

Երեւանի Մայիսի 9-ի փողոցում գտնվող թիվ 133 մանկապարտեզում առավոտյան առաջիններից մեկը քվեարկել է ՀՀ վարչապետ Նիկոլ Փաշինյանն ու այնուհետ ուղեւորվել օդանավակայն՝ դեպի Նյու-Յորք թռիչքի համար: ՀՀ վարչապետը ընտրատեղամաս էր եկել դստեր հետ։

Պատասխանելով լրագրողների հարցերին, վարչապետը նշել է. «Այս ընտրությունները տարբերվելու են նրանով, որ քաղաքացին վստահ է, որ ընտրությունն ինքն է կատարելու, և իր ձայնը չի գողացվելու: Եթե նկատվեն ընտրակեղծարարներ, նրանք կսկսեն բողոքել ոստիկանության գործողություններից»: 

Նիկոլ Փաշինյանի խոսքով՝ այս ընտրարշավն իրական էր, և բոլոր ուժերը հասկանում էին, որ պետք է պայքարեն յուրաքանչյուր ձայնի համար: «Ցանկացած ժողովրդավարական երկրում ընտրարշավի ժամանակ կրքեր են բորբոքվում, և կարծում եմ՝ սրանից հետո Հայաստանում ընտրարշավի ընթացքում կրքեր են բորբոքվելու, որովհետև ընտրությունները լինելու են իրական: Պետք է սովորել իրական ընտրությունների և իրական քարոզարշավի», - ասել է վարչապետը։

Նիկոլ Փաշինյանը նշեց, որ ընտրություններին չի հետևելու, քանի որ լինելու է օդանավում, սակայն ասաց, որ դժգոհ լինելու պատճառներ չունի։ Վարչապետը շտապում էր մեկնել Նյու Յորք։ Հարցին, թե ինչ ակնկալիքներ ունի, ասաց, որ Նյու Յորքից չունի՝ Հայաստանից են ակնկալիքները, Երևանից են։

Անդրադառնալով երեկ ԲՀԿ շտաբում ոստիկանությության կատարած խուզարկումներին՝ վարչապետն ասաց. «Կարծում եմ՝ ոստիկանության գործողությունները եղել են հիմնավորված, օրենքով սահմանված կարգով»

Հիշեցնենք, որ վարչապետը ներկայացնում է «Իմ քայլը» դաշինքը, որի ցուցակում ներկայացված են «Քաղաքացիական պայմանագիր» կուսակցության անդամներ, հեղափոխությանն ակտիվ մասնակցած քաղաքացիներ:

Ցուցակը գլխավորում է դաշինքի քաղաքպետի թեկնածու Հայկ Մարությանը: