Վրաստանի նախագահներին կզրկեն ցմահ պահպանությունից

Վրաստանի խորհրդարանը, հավանաբար, սեպտեմբերի 19-ին կսկսի օրենսդրական փոփոխությունների փաթեթի քննարկումը, որի համաձայն՝ երկրի նախագահը կզրկվի ցմահ անձնական պահպանությունից օգտվելու իրավունքից, հայտնում է «Նովոստի Գրուզիան»:

Գործող օրենքի համաձայն՝ Վրաստանի նախագահն անձնական պահպանությունից օգտվում է ընտրվելու օրից մինչեւ իր կյանքի վերջը: Օրինագծերի նախաձեռնողն է Վրաստանի կառավարությունը, հեղինակը՝ Պետական պահպանության հատուկ ծառայությունը:

Նոր նախաձեռնության համաձայն՝ անհատական պահպանություն կնշանակվի նաեւ ինչպես գործող նախագահի ընտանիքի անդամների համար, այնպես էլ վարչապետի եւ խորհրդարանի նախագահի:

Դրանից բացի, փոփոխությունները թույլ են տալիս, որ նախագահի, վարչապետի եւ խորհրդարանի ղեկավարի անհատական պահպանությունից օգտվելու իրավունքը երկարացվի: Սակայն այս որոշումը պետք է ընդունի Վրաստանի կառավարությունը: