Ռոբերտ Քոչարյանի վերադարձ ուղղակի չի կարող լինել. Փաշինյան

Մարդիկ կան, որ արտաքին քաղաքականություն ասելով հասկանում են այն, ինչ Հայաստանը տարել է ձախողումների: Այս մասին լրագրողների հարցին ի պատասխան, թե ինչպես կմեկնաբանի ՀՀ երկրորդ նախագահ Ռոբերտ Քոչարյանի՝ նոր իշխանությունների արտաքին և տնետսական քաղաքականության մասով հնչեցրած քննադատությանը հայտարարեց ՀՀ վարչապետ Նիկոլ Փաշինյանը:

«Մենք չենք պատրաստվում այդ նույն ճանապարհով գնալ»,- շեշտեց նա:

Հարցին՝ մտահոգո՞ւմ  է իրեն Ռոբերտ Քոչարյանի վերադարձը քաղաքականություն, վարչապետն արձագանքեց.

«Դուք խոսում եք սցենարների մասին, որոնք ուղղակի չեն կարող լինել: Ինձ պետք չէ հարցնել՝ դուրս եկեք փողոց ու մարդկանց հարցրեք, թե իրենք ինչպես են վերաբերում ... ես չեմ այդ կապակցությամբ որոշումներ կայացնողը, որոշումներ կայացնողը ժողովուրդն է: Այդ հարցերը պետք է ուղղել ժողովրդին, չնայած չեմ  կարծում, թե այն, ինչ կլսեք, արժանի կլինի եթեր հեռարձակել»,- ասաց Նիկոլ Փաշինյանը:

Հիշեցնենք, իր վերջին հարցազրույցում Ռոբերտ Քոչարյանը հայտարարել էր, որ վերադառնում է քաղաքականություն: 

Վարչապետը նաև անդրադարձել է Ազգային Ժողովի նախագահ Արա Բաբլոյանի հայտարարությանը, թե խորը մտահոգություն ունի երկրում ստեղծված իրավիճակի կապակցությամբ և վարչապետին ուղղված քննադատությանը: Փաշինյանը հայտարարեց, որ ինքը կհանդիպի Արա Բաբլոյանի հետ, ինչո՞ւ ոչ։

«Կհանդիպեմ, կքննարկեմ, որպեսզի որևէ մեկի մոտ, որևէ հավելյալ մտավախություն չլինի, բացի օրինականությունից։ Մեզ համար շատ կարևոր է, որ մեր բոլոր քաղաքացիները, այդ թվում՝ պատգամավորները, մեր քաղաքական գործունեության բովանդակությունը ճիշտ ընկալեն և հավելյալ մտավախություններ, կամ վախեր չունենան», - նշեց նա:

Բայց, նշեց երկրի վարչապետը, Հանրապետական կուսակցությունը՝ Սերժ Սարգսյանի ղեկավարությամբ, շարունակում է ճիշտ չգնահատել իրավիճակը. «Ես ոչ մեկին ճնշումների չեմ ենթարկում, ես բոլորին կոչ եմ անում հաշվի նստել ժողովրդի կարծիքի ու տեսակետների հետ», — հավելեց նա:

Հիշեցնենք, Արա Բաբլոյանը հայտարարել էր, որ մտահոգիչ ստեղծված իրավիճակը քննարկելու նպատակով նախատեսում է հանդիպումներ հանրապետության նախագահի, վարչապետի, Մարդու իրավունքների պաշտպանի, Բարձրագույն դատական խորհրդի և միջազգային դիվանագիտական առաքելությունների ներկայացուցիչների հետ։