ՀՅ Դաշնակցությունը չի բացառում Հայաստանի երկրորդ նախագահ Ռոբերտ Քոչարյանի հետ համագործակցությունը: Այս մասին «Ազատության»-ը տված հարցազրույցում հայտարարել է ՀՅԴ Բյուրոյի ներկայացուցիչ Հրանտ Մարգարյանը։
Դիտարկմանը, թե խոսվում է, որ Ռոբերտ Քոչարյանը մտադիր է վերադառնալ ակտիվ քաղաքականություն և արդյոք այդ դեպքում ՀՅԴ-ն մտադիր է համագործակցել Քոչարյանի հետ, Մարգարյանը նշել է, որ Դաշնակցությունը բոլոր ուժերի հետ էլ մտադիր է գործակցել։ Ճշտող հարցին՝ այդ թվում Քոչարյանի՞, արձագանքել է.
«Բոլորի հետ, բոլոր հայերի հետ մենք պատրաստ ենք համագործակցության, բայց հատուկ Քոչարյանի հետ համագործակցության ոչ որոշում ունենք, ոչ էլ օրակարգ»։
«Ազատության» հարցին՝ փաստորեն չեք բացառո՞ւմ Ռոբերտ Քոչարյանի հետ համագործակցությունը և մտադի՞ր եք համագործակցել, Մարգարյանը նշել է. «Ինչո՞ւ պետք է բացառեմ։ Ես ո՛չ մտադիր եմ, ո՛չ բացառում եմ»։ Սակայն, նրա խոսքով, նման առաջարկ չի եղել: Եվ իրենք էլ Քոչարյանին նման համագործակցություն մտադիր չեն առաջարկելու:
Եվս մեկ հարցի՝ հաշվի առնելով 2008 թվականի «Մարտի 1»-ի դեպքերը, Դուք հնարավոր համարո՞ւմ եք Ռոբերտ Քոչարյանի հետ համագործակցությունը, դաշնակցական գործիչը նշել է.
«Ես «Մարտի 1»-ի իրադարձությունների մասին սեփական դատողություն չունեմ, ես գիտեմ, որ դեպքը պատահեց այդ ժամանակ բոլորի մեղքով, և այդ 8-10 զոհերը, անկախ, թե ով է կրակել նրանց վրա, մեղքը բոլորի վզին է՝ Լևոն Տեր-Պետրոսյանի վզին էլ է փաթաթված, Ռոբերտի վզին էլ է փաթաթված։ Դա այդպես պետք է նայել, կարևոր չի, թե ով է կրակել, կարևորը, թե այդ երևույթն ով է ստեղծել։ Ո՞վ ստեղծեց այդ երևույթը։ Բոլորը միասին ստեղծեցին։ Մենք այն ժամանակ էլ զգուշացրել ենք՝ թե՛ ընդդիմությանը, թե՛ Ռոբերտ Քոչարյանին, որ էս ճանապարհով մի գնցեք, սա վտանգավոր է, մեզ չեն լսել։ Մենք դեմ ենք եղել դրան և մտահոգ ենք եղել, կեցված ենք ունեցել և կեցվածքն էլ արտահայտել ենք, կեցվածքի համար էլ ճիգ ենք թափել, աշխատել ենք, փորձել ենք որ մեղմենք, չենք հաջողել»։
Միևնույն ժամանակ նա գտնում է, որ Քոչարյանին մեղադրանք առաջադրելը խայտակում է Հայաստանը.
«Մեր երկրին վայել չէ, որ նախագահական ինստիտուտը այդպես խայտառակեն: Ինձ չի վերաբերում, Ռոբերտ Քոչարյանը կարող է իրան պաշտպանի և ես ոչ մի շահ չունեմ իրեն պաշտպանելու հարցում, ես պաշտպանում եմ սկզբունքը, սկզբունքը, որ նախագահական ինստիտուտը պետք է մեր երկրի մեջ հարգվի, պետք է դրա համար, եթե նույնիսկ պարտավոր ենք գին վճարել, պետք է կարողանանք գին վճարել։ 1996 թվականին Լևոն Տեր-Պետրոսյանը տանկեր դուրս բերեց փողոց, եթե անաչառ ենք, բա ինչո՞ւ դա չենք քննում, ես չեմ ասում, որ քննենք, ես ասում եմ, որ պետք չէ անցյալն այնպես խառնենք իրար, որ այսօրվա և վաղվա կյանքը վտանգվի»:
«Ազատության» դիտարկմանը, թե տասը տարի առաջ արյունալի իրադարձություններ են տեղի ունեցել Հայաստանում և ոչ ոք դրա համար պատասխանատվության չի ենթարկվել, Մարգարյանը նշել է, որ դեմ չէ քննարկմանը, բայց քննարկում պետք է լինի այնպես, որ վստահություն ներշնչի՝ անկախ այն արդյունքից, որ հետո կհայտնվի։
«Պետք է հարցաքննեն էլ նախագահին, պետք է քննություն էլ կատարեն, ամեն ինչ էլ պետք է անեն, բայց այնպես, որ վստահություն մթնոլորտ ստեղծվի, ոչ թե քաղաքական հալածանքի տպավորություն թողնի։ Ես տպավորության մասին եմ խոսում, ես դեռ չգիտեմ քաղաքական հալածանքի մասին, դա կխոսի ինքը՝ Ռոբերտ Քոչարյանը»,- հավելել է նա։
