«Բեսպրեդելի» վերջը տալու ենք. ֆեոդալների ու իշխանիկների ժամանակն անցել է. Փաշինյան

Հայաստանում այլևս անձեռնմխելի մարդիկ չկան ու չեն լինելու։ Այս մասին Գորիսում քաղաքացիների հետ հանդիպմանը հայտարարեց ՀՀ վարչապետ Նիկոլ Փաշինյանը։

Նա նշեց, թե իրեն չի հետաքրքրում ով է հանցագործություն կատարել կամ օրենք խախտել, կարևորը նա է, որ այդ մարդիկ պետք է պատասխանատվություն կրեն.

«ՀՀ–ում «բեսպրեդելի» վերջը պիտի տանք ու արմատախիլ անենք. ֆեոդալների ու իշխանիկների ժամանակն անցել է: Եվ դա հնարավոր է ժողովրդի աջակցության շնորհիվ, որը ես ունեմ, իսկ որ պահին զգամ, որ այլևս չունեմ այդ աջակցությունը, ես ոչ մի վայրկյան չեմ մնա վարչապետի աշխատասենյակում»,– հայտարարեց Փաշինյանը։

Իսկ Սիսիանում քաղաքացիների հետ հանդիպման ժամանակ նա հավաստիացրեց, որ կառավարությունը ազատականացնում է տնտեսական դաշտը և հորդորեց որևէ մեկին չվախենալ սկսել բիզնես, քանզի այլևս ոչ ոք չի մտնի նրանց բիզնեսի մեջ.  

«Մենք այժմ ազատականացնում ենք տնտեսական դաշտը, մարդիկ պետք է իմանան, որ կարող են ներդրումներ անել Հայաստանում։ Ես հորդորում եմ սիսիանցիներին ոչ թե օգնություն ուղարկել, այլ ներդրում անել այստեղ, աշխատատեղ ստեղծել։ Երաշխավորում եմ ոչ մեկը փայ չի մտնի ձեր բիզնեսին»,հավաստիացրեց վարչապետ Փաշինյանը։