Արտահերթ ընտրություններ անցկացնելու շուրջ կա քաղաքական կոնսենսուս. փոխվարչապետ

Արտահերթ խորհրդարանական ընտրություններ անցկացնելու շուրջ կա քաղաքական կոնսենսուս։ Այս մասին հայտարարել է ՀՀ առաջին փոխվարչապետ Արարատ Միրզոյանը:

Նշենք, որ այսօր տեղի է ունեցել կառավարությանն առընթեր ընտրական օրենսդրության բարեփոխության հանձնաժողովի առաջին նիստը:

«Հայաստանում կա քաղաքական կոնսենսուս: Արտահերթ ընտրությունները կանցկացվեն մեկ տարվա ընթացքում, ինչպես և նշված է կառավարության գործունեության ծրագրում», - ասել է Միրզոյանը։

Փոխվարչապետի խոսքով, ռեյտինգային ընտրակարգի վերաբերյալ քննարկում այսօրվա նիստում չի եղել, բայց ընտրակարգի վերաբերյալ երկու մոտեցում է շրջանառվում՝ 100 տոկոսանոց համամասնական և խառը համամասնական ընտրակարգ, երբ մեկ համամասնական ցուցակ է լինելու, որտեղ քաղաքացիները կարող են վերադասավորումներ անել իրենց քվեով։ Բայց վերջնական որոշում դեռ չկա: