Շիրակ Թորոսյանը որոշում կայացրեց՝ ՀՀԿ խմբակցության նիստին չսպասելով

ԱԺ ՀՀԿ խմբակցության պատգամավոր Շիրակ Թորոսյանը, ում ՀՀԿ-ն մեղադրում էր Նիկոլ Փաշինյանի օգտին քվեարկելու համար, հայտարարություն է տարածել, որով տեղեկացնում է, որ որոշում է կայացրել դուրս գալ ՀՀԿ խմբակցությունից.

«Հաշվի առնելով քաղաքական գործընթացների վերաբերյալ իմ և ԱԺ ՀՀԿ խմբակցության տեսակետների անհամատեղելիությունը, ինչպես նաև իմ քաղաքական թիմի՝ «Հզոր հայրենիք» կուսակցության՝ առաջիկայում սպասվելիք արտահերթ խորհրդարանական ընտրություններին առանձին մասնակցելու հնարավոր որոշման կայացումը, այլևս աննպատակահարմար եմ համարում մնալ ԱԺ ՀՀԿ խմբակցությունում և հայտարարում եմ, որ դուրս եմ գալիս այս խմբակցությունից՝ շարունակելով իմ խորհրդարանական գործունեությունը որպես ՀՀ ԱԺ անկախ պատգամավոր»,- ասված է Շիրակ Թորոսյանի հայտարարության մեջ:

Հիշեցնենք, քիչ առաջ հայտնի դարձավ, որ ՀՀԿ խմբակցության անդամ Արթուր Գևորգյանը՝ ՀՀ նախկին ոստիկանապետ Վլադիմիր Գասպարյանի փեսան և Բռնցքամարտի ֆեդերացիայի նախագահը, որոշում է կայացրել դուրս գալ Հանրապետական կուսակցությունից:Հայտնի է, որ այսօր ՀՀԿ խմբակցությունը նիստ է գումարելու, որի օրակարգում էր Շիրակ Թորոսյանի հարցը, սակայն պատգամավորը, փաստացի, չսպասեց խմբակցության որոշմանը:

Ավելի վաղ հայտնել էինք, որ Նիկոլ Փաշինյանի թեկնածությանը կողմ էին քվեարկել ՀՀԿ խմբակցության անդամներ Շիրակ Թորոսյանը և Միհրան Պողոսյանը, թեև նման պայմանավորվածություն չի եղել: Ճիշտ է, ՀՀԿ խմբակցության ղեկավար Վահրամ Բաղդասարյանն ասել էր, որ այն անձինք, ովքեր կքվեարկեն Նիկոլ Փաշինյանին կողմ, գործելու են կուսակցական եւ խմբակցության որոշման համաձայն եւ ըստ այդմ այդ անուններից պետք չէ կառչել, քանի որ նրանք կարող էին լինել ՀՀԿ խմբակցության ցանկացած այլ պատգամավորներ, բայց այս երկու պատգամավորների «կողմը» տհաճ անակնկալ էր Հանրապետականին և Թորոսյանին, մեղմ ասած, հետապնդում էին այդ որոշման համար: