Տեսախցիկների ու արագաչափերի գործունեությունը ժամանակավոր դադարեցնել կամ կասեցնել. վարչապետ

Կառավարության այսօրվա նիստում վարչապետ Նիկոլ Փաշինյանն անդրադարձավ երթևեկությանը հետևող արագաչափերի և տեսախցիկների գործունեությանը:

«Ես կարծում եմ, որ այնտեղ հսկայական տուգանքներ կան կուտակված, որոնք մարդիկ չեն վճարել, ենթադրվում է, դրա հնարավրությունը չունենալու պատճառով», - Aysor.am-ի հաղորդմամբ ասաց Նիկոլ Փաշինյանը:

Նա նշեց, որ պետք է մեխանիզմներ մտածել այդ պարտքերը ներելու մասին:

«Պետք է մտածել արագաչափերի, տեսախցիկների գործունեության հետագա արդյունավետության մասին, կարծում եմ, նպատակահարմար կլինի ինչ-որ մի ժամանակաշրջանում, եթե կա այդպիսի օրենսդրական հնարավորություն: Եթե չկա՝ մտածել այդ օրենսդրական հնարավորության մասին, դրանց գործունեությունը ժամանակավորապես դադարեցնելու կամ կասեցնելու մասին», - ասաց վարչապետը:

«Մարդկանց անընդհատ տուգանելու մոլուցքը պետք է շատ արագ կանգնեցնել: Առնվազն պետք է այդ պրակտիկան դադարեցնենք, երբ հոծ գծեր շոշափելու համար մարդկանց տուգանում են», - ասաց նա:

Նիկոլ Փաշինյանը ՀՀ ոստիկանապետին ու արդարադատության նախարարին առաջարկեց քննարկում հրավիրել այս թեմայի շուրջ: