ՀՀԿ-ն վարչապետի պաշտոնում կառաջադրի Սերժ Սարգսյանի թեկնածությունը. Շարմազանով

Իշխող Հանրապետական կուսակցությունը Հայաստանի վարչապետի պաշտոնում կառաջադրի կուսակցության ղեկավար Սերժ Սարգսյանի թեկնածությունը, այսօր ՀՀԿ ԳՄ նիստից հետո հայտարարեց կուսակցության խոսնակ, Ազգային ժողովի փոխնախագահ Էդուարդ Շարմազանովը:

«Քննարկումները գնացին միասնության, համերաշխության մթնոլորտում: Առանց բացառության, Հանրապետական կուսակցության Գործադիր մարմնի բոլոր գործիչները ընդունեցին այն առաջարկը, որն արվել էր նախօրեին և մենք որպես Գործադիր մարմին շաբաթ օրը ՀՀԿ խորհրդի նիստին կներկայացնենք վարչապետի թեկնածուին», - հայտարարեց Էդուարդ Շարմազանովը: - «Կարծում եմ պարզ է, թե ով է լինելու մեր վարչապետի թեկնածուն, որովհետև այլ անուն մենք չենք քննարկել, այլ կարծիքներ չեն հնչել, և կարծում եմ որևէ մեկի մտքով չի էլ անցել: Մենք բոլորս միահամուռ վստահում ենք մեր կուսակցության նախագահին և պարոն Կարեն Կարապետյանի առաջարկը գտել է բոլոր Գործադիր մարմնի անդամների մոտ հավանություն: Այս ամիսների ընթացքում մենք բոլորս այդ կարծիքներին անդրադարձել ենք, խորհրդի նիստին արդեն պաշտոնապես Հայաստանի Հանրապետական կուսակցությունը որոշում կկայացնի: Պարզապես նշեմ, որ Գործադիր մարմնում այլ կարծիք չի հնչել, այլ թեկնածու չի էլ առաջադրվել, չի էլ քննարկվել»:

Հայաստանի վարչապետի պաշտոնակատար Կարեն Կարապետյանը ապրիլի 9-ին հայտարարել էր, որ Սերժ Սարգսյանի հետ հանդիպման ժամանակ որոշել են «առաջարկել այս ժամանակահատվածում ներկայիս կառավարման կոնֆիգուրացիան պահպանել, այսինքն, որպես առաջին դեմք ներկայացնել Սերժ Սարգսյանի թեկնածությունը»: