«Հիմնադիր խորհրդարան»-ի առաջնորդ Ժիրայր Սեֆիլյանը դատապարտվեց 10 տարի հինգ ամսվա ազատազրկման:
Ազատության հաղորդմամբ, դատավորն ամբողջությամբ ապացուցված համարեց, որ Սեֆիլյանը Հայոց ցեղասպանության 100-րդ տարելիցին նախապատրաստել է զանգվածային անկարգություններ` իշխանության ներկայացուցչին զինված դիմադրություն ցույց տալով, բռնություն գործադրելով, գույք ոչնչացնելով և այլն, հետագայում էլ` արդեն Սահմանադրական հանրաքվեին ընդառաջ, ապօրինի ձեռք է բերել հրազեն ու ռազմամթերք` նպատակ ունենալով գրավել ռազմավարական նշանակության շենքեր, իշխանություններին պարտադրել ինչ-որ գործողություններ:
Մեղադրանքում նշվում է, որ Սեֆիլյանն իր կամքից անկախ ավարտին չի հասցրել հանցավոր մտադրությունները, սակայն չի հստակեցվում, թե մասնավորապես ինչու, օրինակ, 2015 թվականի դեկտեմբերի 1-ին նա չի գրավել Նորքի հեռուստաաշտարակը, այլ ընդամենը հանրահավաք է անցկացրել Ազատության հրապարակում:
Գևորգ Սաֆարյանը դատապարտվեց 5.5 տարվա ազատազրկման:
Այս գործով անցնող մյուս մեղադրյալներ Սասունիկ Կիրակոսյանը և Ներսես Պողոսյանը դատապարտվեցին 3.5-ական, Գալուստ Գրիգորյանը և Հրայր Թոփչյանն էլ՝ 3-ական տարվա ազատազրկման:
Ամենամեղմ՝ 2 տարվա ազատազրկման պատժի արժանացավ մեղադրյալ Հովհաննես Պետրոսյանը: Նա միակն է, որ դատարանում Սեֆիլյանի դեմ ցուցմունք է տվել և փաստորեն ընդամենը երկու ամսից ազատ կարձակվի:
Պետրոսյանը հայտարարել է, թե «Հիմնադիր խորհրդարան»-ի առաջնորդի հետ ծանոթացել է Ֆեյսբուքով ու ցուցում ստացել պատրաստվել զինված գործողության:
Մյուս մեղադրյալները պնդել են, որ գործը շինծու է, բարձրաձայնել են, որ ճնշումների են ենթարկվել քննիչների կողմից, իրավապահները փորձել են ցուցմունքներ կորզել Սեֆիլյանի դեմ, ոմանք հայտարարել են, որ անձամբ չեն ճանաչում Սեֆիլյանին, միայն հեռուստացույցով են տեսել, սակայն ըստ մեղադրանքի՝ նրանք Սեֆիլյանի զինված խմբի անդամներ են:
Ժիրայր Սեֆիլյանն իր իսկ գործով քննությանն այդպես էլ չկարողացավ ոչ ցուցմունք տալ, ոչ էլ հանդես գալ պաշտպանական ճառով և անգամ վերջին խոսքով․ դատավորն այդպես էլ թույլ չտվեց նրան խոսել նստած: Ավելին՝ շուրջ տասը ամիս տևած դատավարության մի զգալի մասին ընդդիմադիր գործիչն ընդհանրապես չմասնակցեց, քանի որ դատավոր Տաթևիկ Գրիգորյանը նրան հեռացնում էր դահլիճից՝ ոտքի չկանգնելու, տեղից խոսելու համար:
Սեֆիլյանը հայտարարել է, որ սա ոչ թե դատավարություն է, այլ՝ հաշվեհարդար, պատվիրված քաղաքական հալածանք և բռնություն, թատերական բեմականացում ու ֆարս․ - «Որտեղ այսպես կոչված մեղադրող կողմի հրապարակած դատարկաբանությունը պարզապես վատ հորինված հեքիաթ է, որը դատավորի դերակատարմամբ հանդես եկող անձն իր ջղաձիգ և բացահայտ ապօրինի գործողություններով փորձում է ամեն գնով ներկայացնել որպես իրականություն»:
Փաստաբանների և իրավապաշտպանների գնահատմամբ՝ դատական ողջ գործընթացն ուղեկցվել է աղաղակող խախտումներով: Դատավոր Տաթևիկ Գրիգորյանը տասնյակ սանկցիաներ է կիրառել ոչ միայն մեղադրյալների ու նրանց փաստաբանների, այլ նաև դատավարությանը մասնակցող Սեֆիլյանի համակիրների դեմ:
Մեղադրող դատախազը պահանջել էր 11 տարվա ազատազրկման դատապարտել Սեֆիլյանին` որպես ապացույց վկայակոչելով, օրինակ, «տարաբնույթ սադրիչ ելույթները, կոչերը», որոնցով մարդկանց տրամադրել է «իշխանության ներկայացուցչին զինված դիմադրություն ցույց տալով արտահայտված զանգվածային անկարգությունների»:
Շուրջ երկու տարի ճաղերի հետևում գտնվող Շուշիի առանձնակի գումարտակի հրամանատար Սեֆիլյանը բարձրագույն պետական պարգևի՝ Մարտական խաչի առաջին աստիճանի ասպետի շքանշանակիր է: Իշխանությունները նրան մի քանի անգամ մերժել են տալ Հայաստանի քաղաքացիություն: Ռոբերտ Քոչարյանի օրոք` 2007 թվականի նա դատապարտվել է 1.5 տարվա ազատազրկման` ապօրինի զենք եւ զինամթերք պահելու մեղադրանքով: Հետագայում Եվրոպական դատարանը վճռեց, որ Սեֆիլյանի իրավունքները խախտվել են:
