Ադրբեջանի իշխանությունները ՄԻԵԴ-ի որոշումներով փոխհատուցումները չեն վճարում

Ադրբեջանի իշխանությունները վերջին տարիներին ՄԻԵԴ-ի որոշումներով փոխհատուցում չեն վճարում: Այս մասին հաղորդում է contact.az-ը:

Աղբյուրի համաձայն՝ բողոքների թիվը աճում է ամեն տարի: Այս տարվա հունվարի տվյալներով՝ Ադրբեջանը յոթ երկրներից է, որի դեմ բողոքում են Եվրադատարանում, եւ Ստրասբուրգի դատարան ստացած բոլոր բողոքների 4 տոկոսը բաժին է ընկնում Ադրբեջանին: Անցյալ տարի Ադրբեջանից բողոքների թիվը կազմել է 679: Սա գրեթե երկու անգամ ավելի է, քան 2016 թվականին:

Անցյալ տարվա հոկտեմբերին Եվրախորհրդից երկրին հանելու հարց առաջացավ՝ REAL շարժման առաջնորդ Իլգար Մամեդովի վերաբերյալ որոշումը չկատարելու համար:

Ավելի վաղ իշխանությունները, ճշտապահ վճարում էին Եվրոպական դատարանի որոշումներով տուժածների փոխհատուցումները, բայց վերջին տարիներին դադարել են դա անել:

Քաղաքացիական հասարակության ակտիվիստների մեծամասնությունը, ընդդիմադիր կուսակցությունների ներկայացուցիչները, որոնց օգտին Եվրոպական դատարանը որոշում է կայացրել, չեն կարողանում փոխհատուցում ստանալ: «Մեր գործերի վերաբերյալ որոշումը կայացվել է 2016 թվականի աշնանը, պետությունը պետք է փոխհատուցումը վճարեր 6 ամսվա ընթացքում: Վճարումը սկսվեց բավական ուշ`անցյալ տարվա հունիսին: Ամենահետաքրքիրն այն է, որ մեզ չվճարեցին ամբողջ գումարը, այլ փոքր մասերով՝ մինչեւ օգոստոս: Այնուհետեւ վճարումները դադարեցվեցին եւ դեռեւս չեն վերականգնվել», - Turan-ին ասել է մի քաղաքացի, ով ցանկացել է անանուն մնալ:

Ըստ փաստաբան Ասաբալի Մուստաֆաեւի, որը եվրոպական դատարանում տասնյակ գործեր է հաղթել է, նա նույնպես չգիտի փոխհատուցման վճարների դադարեցման պատճառը: «Պատճառները մեզ չեն բացատրում: Մենք ենթադրեցինք, որ դա պայմանավորված է ընթացիկ տարվա բյուջեի ընդունմամբ, բայց բյուջեն վաղուց արդեն ընդունվել եւ հաստատվել է, բայց վճարումները չկան: Մենք գրում ենք Եվրոպայի խորհրդի Նախարարների կոմիտեին, նրանք դիմում են իշխանություններին, իսկ նրանք լռում են», - ասել է Մուսթաֆաեւը: