Սարգսյան-Ալիև հանդիպումը տեղի կունենա երկու երկրներում ընտրություններից հետո. Մամեդյարով

Պաշտոնական Բաքուն չի բացառում Ադրբեջանի և Հայաստանի նախագահների հերթական հանդիպումը Լեռնային Ղարաբաղի հարցով երկու պետություններում կայանալիք նախագահական ընտրություններից հետո: ԱՊԱ հաղորդմամբ, այս մասին հայտարարել է Ադրբեջանի արտաքին գործերի նախարար Էլմար Մամեդյարովը:

Նա հիշեցրել է, որ Հայաստանում նախագահ կընտրեն մարտի 2-ին, իսկ Ադրբեջանում արտահերթ ընտրությունները կկայանան ապրիլի 11-ին:

«Երբ մենք վերջին անգամ քննարկում ունեցանք ԵԱՀԿ Մինսկի խմբի համանախագահների հետ, մենք հաշվի առանք նախընտրական տրամադրությունները Հայաստանում և Ադրբեջանում և պայմանավորվեցինք վերադառնալ, երբ էմոցիոնալ այդ ֆոնն ավարտվի: Կան հետաքրքիր գաղափարներ ու արված քայլեր, որոնք արդեն քննարկվել են արտգործնախարարների հետ Կրակովում և ավելի վաղ Վիեննայում: Այնպես որ մենք լի ենք էնտուզիազմով և ցանկությամբ ակտիվ շարունակել բանակցային գործընթացը, ինչի մասին մեզ մշտապես հորդորում են համանախագահները», - հայտարարել է ադրբեջանցի նախարարը Ժնևում:

Մամեդյարովն ընդգծել է, որ Բաքվի համար ներկա պահին Ղարաբաղյան հակամարտության խաղաղ կարգավորմանը այլընտրանք գոյություն չունի: