Ո՞վ է դեղատոմսով վաճառքի նախաձեռնության հեղինակը.«Երկիր Ծիրանի»-ն դիմել է Լևոն Ալթունյանին

ՀՀ առողջապահության նախարար Լեւոն Ալթունյանի կողմից նախառեռնված կասկածելի ծրագրից՝ 13 տարեկան 16 հազար հայ աղջիկներին «Գարգասիլ» պատվաստանյութով պատվաստելու խայտառակ եւ վտանգավոր որոշումից հետո այժմ էլ նախաձեռնվում է բնակչության եւ բժշկական անձնակազմերի համար մեծ դժվարություններ առաջացնող հերթական խայտառակ ծրագրի իրականացումը՝ բազմաթիվ դեղեր միայն դեղատոմսերով ձեռք բերելու մասին: Այս մասին հաղորդագրություն է տարածել «Երկիր Ծիրանի» կուսակցությունը:

Մարինա Խաչատրյանը հարցումով դիմել է նախարար Լեւոն Ալթունյանին՝ խնդրելով տեղեկատվություն տրամադրել 2018 թվականի մարտի 1-ից դեղատոմսերով դեղեր ձեռք բերելու հիմքերի մասին:

«Խնդրում եմ տրամադրել 2018թ-ի մարտ ամսից դեղատոմսով եւ առանց դեղատոմսի վաճառվող դեղորայքի ամբողջական ցանկը,

Ո՞վ կամ ովքե՞ր են այս նախաձեռնության հեղինակները (խնդրում եմ նշել կոնկրետ անուններ),

Ե՞րբ է հաստատվել վերոնշյալ նախաձեռնությունը որպես իրավակիրառվող որոշում, ու՞մ կողմից եւ ինչո՞ւ է այն հատկապես 2018 թվականին մտնում գործածության մեջ,

Բժշկական ծառայություններ մատուցող բուժհաստատությունները այս համակարգը ներդնելու ուղղությամբ ունե՞ն համապատասխան ռեսուրսներ, եթե այո, ապա ունե՞ք հետազոտություն, խնդրում ենք տրամադրել ուսումնասիրության արդյունքները,

Գնահատե՞լ եք արդյոք այս համակարգի ներդրման ռիսկերը, որո՞նք են այդ ռիսկերը,

Հաշվի առնելով բնակչության դժգոհությունները՝ ինչպե՞ս եք պատրաստվում արձագանքել դրանց»,- ասված է դիմումում:

Հիշեցնենք, մարտի 1-ից մի շարք դեղեր, այդ թվում և մասայական օգտագործման ցավազրկողներ, ճնշման դեղեր վաճառվելու են բացառապես դեղատոմսով: Հուլիսից դեղատոմսով կվաճառվեն մի խումբ այլ դեղեր և ամբողջական գործընթացը կավարտվի սույն թվականի հոկտեմբերին:

Նշենք, որ արգելքի տակ ընկնող դեղերի ցանկում են Անալգինը, Իբուպրոֆենը, Պենտալգինը, Նո-շպան, բոլոր տեսակի հակաբիոտիկները, հակաբեղմնավորիչները, ճնշում կարգավորող մի շարք դեղեր, ինչը նշանակում է, որ այս որոշումը կբարդացնի հատկապես տարեց մարդկանց օրը: