Քաղաքապետարանը կփակի՞ ավագանու նիստերը լրագրողների առջեւ. ԵԾ-ի ակցիայի պատասխանը

Երեւանի քաղաքապետարանում կայացած աշխատանքային խորհրդակցության ժամանակ քաղաքապետ Տարոն Մարգարյանը Երեւանի ավագանու աշխատանքներն առավել արդյունավետ կազմակերպելու նպատակով աշխատակազմի իրավաբանական վարչությանը, քաղաքապետի խորհրդական Գագիկ Բաղդասարյանին եւ աշխատակազմի քարտուղար Սերգեյ Մակարյանին հանձնարարել է ներկայացնել ավագանու կանոնակարգում փոփոխություններ կատարելու մասին առաջարկություններ՝ դրանք նախապես քննարկելով Երեւան քաղաքի ավագանու խմբակցությունների հետ:

Ինչպես հայտնում են քաղաքապետարանի մամուլի ծառայությունից, աշխատակազմի իրավաբանական, տեղեկատվության եւ հասարակայնության հետ կապերի վարչություններին, ինչպես նաեւ քաղաքապետի օգնական Մարիա Բարաղամյանին էլ հանձնարարվել է ներկայացնել Երեւանի քաղաքապետարանի վարչական շենքերում լրագրողների աշխատանքը կանոնակարգելու վերաբերյալ առաջարկություն:

Երեւանի քաղաքապետը աշխատակազմի իրավաբանական վարչությանն ու աշխատակազմի քարտուղարին նաեւ հանձնարարել է ներկայացնել առաջարկություններ՝ Երեւանի քաղաքապետարանի վարչական շենքերում աշխատանքային ռեժիմը, մուտքն ու ելքը, ինչպես նաեւ այլ աշխատանքները կանոնակարգելու վերաբերյալ:

Հիշեցնենք, որ քաղաքապետին զայրացրել է այն, որ օրեր առաջ Երկիր ծիրանի կուսակցության ներկայացուցիչները Երեւանի ավագանու նիստի ժամանակ բժշկական դիմակներով բացել են ապակյա տարաները՝ գարշահոտություն տարածելով դահլիճում, ինչը, ըստ քաղաքապետարանի, «աշխատավայրում կատարելն անթույլատրելի է»: ՀՀԿ-ական ավագանու անդամներից ոմանք այդ ակցիան անգամ խուլիգանություն որակեցին:

Իսկ Երեւանի փոխքաղաքապետ Կամո Արեյանը հայտարարել էր, որ չպետք է անպատասխան թողնել այս միջադեպը, պետք է տալ կոշտ գնահատական: Նա առաջարկել էր մտածել մեխանիզմներ՝ «նման վտանգավոր երեւույթներից» զերծ մնալու համար: Նրա հետ համաձայնել է քաղաքապետ Տարոն Մարգարյանը: Տպավորություն է ստեղծվում, որ այս հանձնարարականներով կյանքի է կոչվում հենց փոխքաղաքապետի՝ «վտանգավոր երեւույթներից» զերծ մնալու համար մեխանիզմներ ստեղծելու գաղափարը:

Հատկանշական է, որ շաբաթներ առաջ կառավարությունում նիստերի լուսաբանման հետ կապված հարցի լուծումը գտան՝ դրանք փակ դռների հետեւում անցկացնելու մեխանիզմի կիրառմամբ: Թե ինչ գործելաոճ կորդեգրեն Երեւանի քաղաքապետարանում՝ կիմանանք շուտով: