Ղարաբաղի խնդիրն առաջացել է, երբ այն միացվել է Ադրբեջանին. Հինշթեյն

Ռուսաստանցի լրագրող, Պետական դումայի նախկին պատգամավոր Ալեքսանդր Հինշթեյնը հանրությանն է ներկայացրել իր նոր գիրքը՝ «Ատլանտիդայի վախճանը. ինչու Պուտինը երբեք չի դառնա Գորբաչյով», որում վերլուծել է ԽՍՀՄ փլուզման պատճառներն ու փորձել պատկերացնել Վլադիմիր Պուտինի ԽՍՀՄ նախագահ Միխայիլ Գորբաչյովի տեղը:  

Ռուսարմինֆոյի հաղորդմամբ, լրագրողը պատմել է, որ նախկին ԽՍՀՄ տարածքում աշխարհաքաղաքական հակամարտությունների մեծամասնությունը, այդ թվում և ղարաբաղյան հակամարտությունը խորհրդային ղեկավարության անհեռատես քաղաքականության հետևանք են:  

«80-ական թվականների բոլոր թեժ կետերը ստալինյան քաղաքականության սխալների հետևանք են, քանի որ ոչ ոք դրանց հետևանքները չէր հաշվարկում: Այդպես առաջացել է Ղարաբաղի խնդիրը, երբ քրիստոնյա հայերով խիտ բնակեցված տարածքը միացվել էր մահմեդական Ադրբեջանին» , — պատմել է Հինշթեյնը:

Նա նաև հավելել է, որ 1991 թվականին ԽՍՀՄ-ը բաժանվել է առանց պատմական իրողությունները հաշվի առնելու: