Ադրբեջանն ընտրությունները մոտեցրել է Հայաստանի ընտրություններին. «Կոմերսանտ»

233

Ադրբեջանի կողմից արտահերթ նախագահական ընտրությունների կազմակերպումը և դրանք հոկտեմբերի 17-ից ապրիլի 11 տեղափոխելու որոշումը Բաքվում բացատրում են ներքին, այլ ոչ արտաքին գործոններով, գրում է kommersant.ru-ի թղթակից Կիրիլ Կրիվոշեևը: Միևնույն ժամանակ, լրատվամիջոցը նշում է, որ գլխավոր ինտրիգն այն է, թե ինչպես Բաքվում և Երևանում միաժամանակյա քաղաքական ակտիվությունը կարող է անդրադառնալ տարածաշրջանում՝ մասնավորապես Լեռնային Ղարաբաղի շուրջ իրավիճակի վրա:


Ադրբեջանի նախագահի հասարակա-քաղաքական հարցերով օգնական Ալի Հասանովն ընտրությունների օրվա տեղափոխումը բացատրել է այն հանգամանքով, որ մայիսից սկսած երկրում անցկացվելու են տեղական և միջազգային մակարդակի բազմաթիվ կարևոր միջոցառումներ, որոնց մի մասը համընկնում էին ընտրությունների ժամկետների հետ:


Kommersant.ru-ի հետ զրույցում ադրբեջանական խորհրդարանի պատգամավոր Արազ Ալիզադեն գարնանն ընտրությունների անցկացումը նույնպես բացատրել է ներքին գործոններով՝ նշելով, որ ամռանը նախընտրական արշավի անցկացման դեպքում գյուղատնտեսությունը տուժում է, քանի որ մարդիկ ակտիվ մասնակցում են հանրահավաքների, և բացի այդ, նախընտրական արշավի համար, պատգամավորի կարծիքով, շատ ժամանակ հարկավոր չէ, քանի որ ընտրողները լավ ճանաչում են բոլոր թեկնածուներին:


«Հանրապետական այլընտրանք» ընդդիմադիր շարժման քարտուղար, տնտեսագետ Նաթիգ Ջաֆարլին իր հերթին հայտարարել է, որ ընտրությունների տեղափոխումը եվրոպացի դիտորդների քննադատությունից խուսափելու փորձ է, և նշել է, որ ԵԱՀԿ ժողովրդավարական ինստիտուտների և մարդու իրավունքների գրասենյակը հավանաբար չի հասցնի Ադրբեջան ուղարկել երկարաժամկետ, ինչպես նաև կարճաժամկետ դիտորդական առաքելություն:


Ջաֆարլիի կարծիքով՝ եվրոպական ինստիտուտների ուշադրությունն ապրիլին սևեռված է լինելու Ռուսաստանի ուղղությամբ, բացի այդ, կարող է լինել նաև տնտեսական գործոն՝ երկու տարվա լճացումից հետո Ադրբեջանի տնտեսությունն ակտիվացել է, սակայն հայտնի չէ, թե արդյոք այդ վիճակը կպահպանվեր մինչև հոկտեմբեր:


Ինչպես լրատվամիջոցի հետ զրույցում նշել է հայ քաղտեխնոլոգ Վիգեն Հակոբյանը, տարվա առաջին կեսին երկու երկրներում ընտրությունների անցկացումը կարող է կողմերին հնարավորություն տալ «Լեռնային Ղարաբաղի հակամարտության վերաբերյալ միջանկյալ որոշում կայացնելու, որը պահանջում է ավելի շատ լեգիտիմություն»: Մինչդեռ Հայաստանի իշխող շրջանակներում լրատվամիջոցի զրուցակիցը քիչ լավատեսական է տրամադրված և հայտնել է, որ հակված է Ադրբեջանից սպասել Լեռնային Ղարաբաղում իրավիճակի սրման:


Լրատվամիջոցը նշում է, որ Բաքվում իր զրուցակիցներն, այնուամենայնիվ, միաձայն պնդել են, որ ընտրությունների տեղափոխումը ոչ մի կապ չունի Հայաստանի և Լեռնային Ղարաբաղի հակամարտության հետ:

Տպել

Թեմայի այլ նորություններ
Загрузка...