Արցախի սահմանամերձ բնակավայրերում կառուցվել են ապաստարաններ. նախարար

Անցած տարվա ընթացքում Արցախի մի շարք բնակավայրերում կառուցվել են ապաստարաններ: «Արցախպրես»-ի  հաղորդմամբ այս մասին ասել է Արցախի քաղաքաշինության նախարար Կարեն Շահրամանյանը:

Անդրադառնալով առաջնագծին ուղղված աշխատանքներին՝ քաղաքաշինության նախարարը նշել է, որ առաջնորդվելով ԱՀ կառավարության կողմից հաստատված ծրագրով, մի շարք շինարարական, ինժեներական աշխատանքներ են կատարվել ԱՀ սահմանի ողջ երկայնքով, որոնք միտված են զինվորների ծառայողական եւ կենցաղային պայմանների ապահովմանը, ինչպես նաեւ անվտանգության աստիճանի բարձրացմանը։

«2017թ.-ին սահմանամերձ բնակավայրերում ապաստարանների կառուցման նպատակով ԱՀ կառավարության պահուստային ֆոնդից հատկացվել է 553 մլն 449 հազար դրամ: Եվս 91 մլն 837 հազ. դրամ հատկացվել է գույքի գնման համար, իսկ 80 մլն 259 հազ դրամ ծախսվել է քաղաքացիական պաշտպանության միջոցառումների ծրագրով»,- ասել է նա: