Հունվարի 10-ին Ազգային վիճակագրական ծառայությունն ամփոփել է 2017 դեկտեմբերի և հունվար-դեկտեմբերի սպառողական գների ինդեքսի վերաբերյալ տվյալները, համաձայն որի՝ դեկտեմբերին նոյեմբերի համեմատ արձանագրվել է 1.5 տոկոս գնաճ, իսկ 2017թ. հունվար-դեկտեմբերին նախորդ տարվա համապատասխան ժամանակահատվածի համեմատ սպառողական գների ինդեքսի հավելաճը կազմել է 1 տոկոս, այդ թվում՝ սպառման ապրանքներն աճել են 2.1 տոկոսով, սննդամթերք ու ոչ ալկոհոլային խմիչքներ խումբը՝ 4,1 տոկոսով, ալկոհոլային խմիչքները և ծխախոտը՝ 3.2 տոկոսով, ոչ պարենային ապրանքների գների ինդեքսում նվազում է եղել 1.8 տոկոսով:
Այս մասին Ազգային Ժողովում ընթացող «Առանձին ապրանքատեսակների գների բարձրացման պատճառները և գնաճը մեղմելու հնարավորությունները» թեմայով խորհրդարանական լսումների ժամանակ հայտարարել է ԱՎԾ պետ Ստեփան Մնացականյանը:
Նրա խոսքով, սպառողական գների ինդեքսի աճը կազմել է 2.6 տոկոս, այդ թվում՝ սպառման ապրանքների գների ինդեքսն աճել է 4.2 տոկոսով, սննդամթերքի և ոչ ալկոհոլային խմիչքների խմբում աճը կազմել է 5.2 տոկոս, ոչ պարենային ապրանքների խմբում՝ 1.7 տոկոս, 4 տոկոս՝ ալկոհոլային ու ծխախոտի ապրանքների խմբում: Պաշտոնյան ընդգծել է, որ հիմնական գնաճը եղել է 2017 թվականի վերջին՝ չորրորդ եռամսյակում կուտակային գնաճը կազմել է 4.4 տոկոս:
ՀՀ Կենտրոնական բանկի նախագահ Արթուր Ջավադյանն էլ իր ելույթում հայտարարեց, որ Հայաստանում սննդամթերքի տեսակարար կշիռը սպառողական զամբյուղում կազմում է 41 տոկոս, մինչդեռ Վրաստանում 30 տոկոս է, իսկ զարգացած երկրներում այն չի անցնում 15 տոկոսից՝ ԱՄՆ-ում, օրինակ, այն կազմում է 10-11 տոկոս:
Նա նշեց, որ Հայաստանում սպառողական զամբյուղում մեծությամբ առաջին 4 ծախսերն են սննդամթերքը, կոմունալ ծառայությունների վճարները, առողջապահությունը եւ տրանսպորտը, որոնց հանրագումարը կազմում է ընդհանուր ծախսերի 74 տոկոսը:
«Ելք» խմբակցության ղեկավար Նիկոլ Փաշինյանը, հիշեցնելով, որ կառավարությունը հայտարարում է, որ գնաճը ընդամենը 2,6 տոկոս է կազմում, միևնույն ժամանակ օրինակ բերեց որոշ ապրանքատեսակներ, որոնք թանկացել են մինչև 50 տոկոս: Դրանց թվում են կարագը՝ թանկացել է 48 տոկոսով, խոզի բուդը՝ 31 տոկոսով, խոզի և տավարի միսը՝ 36 տոկոսով, և այլն:
ԿԲ նախագահը ուշագրավ պարզաբանում տվեց.
«Ինչ վերաբերում է ապրանքատեսակներին, որը նշեցիք, ապա կարագի համար առանձին ուսումնասիրություն կատարվել է եւ դեռ մայիս-հունիս ամիսներին ԱՀԿ-ի եւ մի քանի այլ հեղինակավոր ինստիտուտների կողմից հրապարակվել է մի քանի զեկույց, որ այն վնասակարությունը, որի մասին խոսվում էր կարագի մասով՝ խոլեստերին եւ այլն, այդքան էլ ճիշտ չի գնահատվել։ Նոր ուսումնասիրությունները ցույց են տվել, որ հակառակը՝ կարագն օգտակար է, ձեթի օգտագործումը կանցերոգեն բնույթ է կրում եւ կարագի օգտագործումն ավելի օգտակար է, քան ձեթինը։ Դրա հաշվին կտրուկ ավելացավ կարագի սպառումը եւ պահանջարկը, մի շարք երկրներում կարագի դեֆիցիտ եղավ: Հենց այդ դեֆիցիտի հաշվին էլ գները կտրուկ բարձրացան»:
Նշենք, որ երեկվա դրությամբ բենզինը կրկին թանկացել է: Եթե օրեր առաջ ԱԺ-ում վարչապետը հայտարարում էր, որ բենզինը թանկացել է ընդամենը 20 դրամով, ապա այսօրվա դրությամբ թանկացումը կազմում է արդեն 30-40 դրամ: Այսինքն՝ մեկ ամսվա ընթացքում 30-40 դրամ թանկացում:
