Անկարան Բաղդադի հետ կքննարկի Իրաքում թուրք զինվորականների ներկայությունը. Չավուշօղլու

Անկարան Բաղդադի հետ կքննարկի Իրաքում՝ Բաշիքի շրջանում, թուրքական զորախմբի ներկայությունը: Trend-ի հաղորդմամբ՝ այս մասին ասել է Թուրքիայի ԱԳՆ ղեկավար Մևլութ Չավուշօղլուն:

Նա նշել է, որ Իրաքում թուրքական զորախմբի ներկայությունն ուղղված չէ Իրաքի դեմ, քանի որ ռազմաբազան Իրաքի տարածքում ստեղծվել է Իրաքի իշխանությունների կոչից հետո:

«Թուրքական զորախումբն Իրաքի տարածքում է գտնվում ԴԱԻՇ ահաբեկչական կազմակերպության դեմ պայքարի նպատակով»,- ասել է Չավուշօղլուն:

Նշենք, որ ավելի վաղ Իրաքի խորհրդարանը բանաձև է ընդունել, որում բողոք է հայտնվել Մոսուլի մոտ՝ Բաշիքի շրջանում, թուրքական զինված ուժերի ներկայության դեմ: Իրաքի խորհրդարանի պատգամավորներն Իրաքի կառավարությունից պահանջել են անհրաժեշտ իրավական և դիվանագիտական միջոցների ձեռնարկել, ներառյալ՝ երկու երկրների տնտեսական հարաբերությունների վերանայում: