Էրդողանը խոսել է Լոզանի պայմանագրի վերանայման անհրաժեշտության մասին

556

Թուրքիայի նախագահ Ռեջեփ Թայիփ Էրդողանը Հունաստան այցից մի քանի ժամ առաջ հունական Skai հեռուստաալիքի հետ զրույցում հայտարարել է, որ Լոզանի խաղաղության պայմանագիրը վերափոխման կարիք ունի:

Հունաստանի կառավարության պաշտոնական ներկայացուցիչը արդեն հայտարարել է Էրդողանի հարցազրույցի հետ կապված «լուրջ մտահոգությունների մասին», փոխանցում է «ՌԻԱ Նովոստի»-ն:

Լոզանի պայմանագրով, ի թիվս այլ հարցերի, սահմանվել են 2 երկրների միջեւ սահմանները, որոշվել են Էգեյան ծովում կղզիների վրա Հունաստանի իրավունքները:

«Երբ խոսում եմ վերափոխման մասին, մենք կարող ենք ամեն ինչ քննարկել՝ ալֆայից մինչեւ օմեգա: Հնարավոր է՝ Հունաստանին որոշ հարցեր զայրացնեն, բայց մենք կարող ենք նստել ու քննարկել»,- ասել է Էրդողանը՝ հստակեցնելով, որ քննարկումը չի վերաբերելու Հունաստանին, այլ ամբողջ տարածաշրջանին: Լոզանի պայմանագրով նաեւ որոշվել են Թուրքիայի, Իրաքի եւ Սիրիայի տարածքային սահմանները:

Թուրքիայի նախագահը չի պարզաբանել, թե ինչ փոփոխություններ է ձգտում կատարել, սակայն ասել է, որ որոշ կղզիների միջեւ հեռավորությունները «խնդրահարույց» են՝ հավելելով, որ 2 երկրների ջրային, օդային եւ ցամաքային շելֆի հարցերը «հեշտ» կլուծվեն:

Էրդողանի հայտարարությունները հակասում են Հունաստանի դիրքորոշմանը, որը 1923 թվականի Լոզանի պայմանագիրը երկկողմ հարաբերությունների անվիճարկելի հիմք է համարում: Հունաստանի կառավարության պաշտոնական ներկայացուցիչը չորեքշաբթի երեկոյան հայտարարել էր, որ Էրդողանի հարցազրույցը «լուրջ մտահոգություններ եւ հարցեր է առաջացնում»:

Տպել

Թեմայի այլ նորություններ