ՀԱՊԿ-ի գագաթնաժողովը. Սարգսյանն ու Նալբանդյանը մեկնում են Մինսկ

Հայաստանի արտգործնախարար Էդվարդ Նալբանդյանն այսօր կմեկնի Մինսկ, ուր նույն օրը ներկա կգտնվի Հավաքական անվտանգության մասին պայմանագրի կազմակերպության (ՀԱՊԿ) անդամ պետությունների արտգործնախարարների հանդիպմանը։

Ըստ Հայաստանի արտգործնախարարության հաղորդման, նոյեմբերի 30-ին՝ ՀԱՊԿ գագաթաժողովին ընդառաջ, Հայաստանի արտաքին քաղաքական գերատեսչության ղեկավարը կմասնակցի ՀԱՊԿ անդամ պետությունների արտգործնախարարների խորհրդի, պաշտպանության նախարարների խորհրդի և անվտանգության խորհուրդների քարտուղարների կոմիտեի համատեղ նիստին:

Մինսկում նոյեմբերի 30-ին կայանալու է ՀԱՊԿ անդամ պետությունների նախագահների գագաթաժողովը: Տրամաբանական է, որ Նալբանդյանից բացի Մինսկ է մեկնելու նաեւ ՀՀ նախագահ Սերժ Սարգսյանը:

Գագաթաժողովից առաջ ՌԴ նախագահ Վլադիմիր Պուտինը հանդիպել է ՀԱՊԿ գլխավոր քարտուղար Յուրի Խաչատուրովի հետ: Ինչպես հայտնում է Կրեմլի մամուլի ծառայությունը, ՀԱՊԿ գագաթնաժողովին կամփոփվեն դաշինքում 2017 թվականին Բելառուսի նախագահության արդյունքները:

Կընդունվեն մի շարք որոշումներ տարբեր ուղղություններով: ՀԱՊԿ անդամ պետությունների նախագահները կքննարկեն արդի խնդիրները, գլոբալ մարտահրավերները և կազմակերպության հետագա գործունեությունը` իբրև տարածաշրջանի հզոր կազմակերպության, որ ապահովում է անվտանգությունը:

Նախատեսվում է նաև նախագահների կողմից ընդունել հռչակագիր, նվիրված ՀԱՊԿ ձևավորման 15-ամյակին: Ինչպես նաև, նախագահները կքննարկեն մինչև 2025 թվականը կազմակերպության կոլեկտիվ անվտանգության պլանի նախագիծը:

2017-2018թթ-ին ՀԱՊԿ նախագահությունն անցնում է Ղազախստանին: Նախագահ Նուրսուլթան Նազարբաևը, ըստ այդմ, կներկայացնի կազմակերպության առաջնահերթություններն այդ ժամանակահատվածի համար: