ՀՀ նախագահ Սերժ Սարգսյանը Բրյուսելում հայտարարել է, որ ՌԴ նախագահ Վլադիմիր Պուտինից երբեւէ կշտամբանք չի լսել Հայաստանի ու Եվրամիության միջեւ համագործակցելու առումով:
«Ես նոր ժողովի ժամանակ նաեւ դա ասացի՝ արդեն շուտով տասը տարի կլինի, որ նախագահ եմ, դրանից առաջ տարբեր պաշտոններում, ես երբեք կես բառ անգամ չեմ լսել Ռուսաստանի որեւէ ղեկավարից, հատկապես նախագահ Պուտինից, որն իր մեջ կշտամբանք պարունակի Եվրամիության հետ մեր համագործակցելու առումով»,- այս մասին «Ազատություն» ռադիոկայանի հայկական ծառայության տնօրեն Հրայր Թամրազյանին տված հարցազրույցում երեկ ասել է Սերժ Սարգսյանը՝ պատասխանելով հարցին, թե դուք վերջերս եք եղել Ռուսաստանում, հանդիպել եք Ռուսաստանի նախագահ Վլադիմիր Պուտինի հետ, որեւէ առարկություն, որեւէ վերապահում եղե՞լ է այս համաձայնագրի հետ կապված։
Նշենք, որ այսօր երեկոյան Հայաստանը պատրաստվում է ԵՄ-ի հետ ստորագրել Համապարփակ եւ ընդլայնված գործակցության համաձայնագիրը, որի համար Բրյուսել է մեկնել Սերժ Սարգսյանը:
Հարցին՝ համաձայնագիրը կնպաստի՞ նաեւ Հայաստանի անվտանգության ամրապնդմանը, սա անվտանգության ապահովման այլընտրանքայի՞ն մի ուղղություն է, Սերժ Սարգսյանը պատասխանել է. «Գիտե՞ք, այստեղ այլընտրանքային բառը ճիշտ չի, բայց՝ իհարկե, նաեւ հատկապես այն դեպքում, երբ որ մեր անվտանգությանը սպառնացող հիմնական մարտահրավերների պարագայում ԵԱՀԿ Մինսկի համանախագահները եւ հատկապես Միացյալ Նահանգներն ու Ռուսաստանը համակարծիք են, եւ սա այն եզակի տեղերից է, որտեղ նրանք ամբողջովին համագործակցում են, ինչպես նրանք են հայտարարում։ Սա, իհարկե, մեզ համար ձեռքբերում է»:
Սերժ Սարգսյանը նշել է նաեւ, որ համաձայնագրի ստորագրմանը հաջորդող երկու օրում շարքային քաղաքացին իր կյանքում որեւէ փոփոխություն չի տեսնի, բայց ժամանակի ընթացքում կզգա, որովհետեւ Հայաստանի իշխանությունները բարեփոխումների ի վիճակի են արագ անցկացնել Եվրամիության աջակցությամբ։ «Ինքներս հեծանիվ հնարելու ունակությունը չունենք եւ ոչ էլ ցանկությունը, կան բացարձակ ճշմարտություններ, եւ այդ ճշմարտություններով մենք պետք է ղեկավարվենք։ Բայց ընթացքում, բացի ներքին ազատություններից, Հայաստանի քաղաքացիները հնարավորություն են ունենալու առանց խոչընդոտի ուղեւորվել դեպի Բրյուսել, դեպի Փարիզ, դեպի եվրոպական այլ երկրներ, եւ կարծում եմ, որ ԵԺԿ-ի այսօրվա հայտարարության մեջ այդ հստակ ձեւակերպումը կար, տեսնենք, թե վաղվա գագաթնաժողովի ժամանակ ինչպիսին կլինի»,- նշել է Սարգսյանը:
Անդրադառնալով 2018 թվականին իր պաշտոնավարման մասին հարցին, Սերժ Սարգսյանն ասել է, որ եթե ինքը պատկերացներ, թե այդ ժամանակ որտեղ է լինելու, ապա վաղուց արդեն հայտարարած կլիներ: «Երբ որ պատկերացնեմ, այն ժամանակ կհայտարարեմ»,- եզրափակել է Սերժ Սարգսյանը:
