Կառավարությունը Սամվել Կարապետյանին թույլ տվեց Դեբեդի վրա ՀԷԿ կառուցել

Լոռու մարզում, 76 ՄՎտ դրվածքային հզորությամբ «Շնող» հիդրոէլեկտրակայանի նախագծման, կառուցապատման, ֆինանսավորման, կառուցման, սեփականության իրավունքով տնօրինման, տիրապետման, շահագործման մասին շրջանակային համաձայնագիրն այսօր հավանության արժանացավ կառավարության կողմից: 

ՀՀ էներգետիկայի և բնական պաշարների նախարար Աշոտ Մանուկյանը հիշեցրեց, որ «Շնող» ՀԷԿ-ի կառուցման նախագիծը գրվել է դեռևս նախորդ դարի 60-ականներին: Նրա խոսքով, բոլոր եզրակացությունները հավաստում են, որ թերօգտագործված են մնում Դեբեդ և Արաքս գետերի ռեսուրսները:

«Հավանության արժանանալու դեպքում այն կկառուցվի պետություն-մասնավոր շրջանակներում՝ «Հայաստանի ներդրողների ակումբի» հետ համատեղ, և սա այդ ակումբի առաջին խոշոր ծրագիրն է: Ըստ հաշվարկների՝ ՀԷԿ-ի կառուցման համար ներդրումների թիվը կհասնի 150-180 միլիոնի, սակայն սա վերջնական չէ: Ծրագրի հիմնական խնդիրը կազմում է 22 կմ երկարությամբ թունելները, որոնք էական ազդեցություն են ունենալու ներդրումների չափի համար:«Շնող»-ը ժամանակակից է լինելու, բնապահպանական տեսանկյունից էլ հնարավորինս անվտանգ»,- ներկայացրեց նախարարը:

Մանուկյանը նաև տեղեկացրեց, որ ՀԷԿ-ը շահագործման հանձնելուց հետո այն կբավարարի ներքին սպառման 5%-ը:

Վարչապետ Կարեն Կարապետյանը, հայտարարելով, որ ներկայացվածը լավ ու հեռանկարային ծրագիր է, հավանության արժանացրեց նախագիծը:

Նշենք, որ համաձայն որոշման՝  ՀԷԿ-ը կառուցելու է «Դեբեդ հիդրո» ընկերությունը, որի հիմնադիրը «Էներգոինվեստ հոլդինգ» ընկերությունն է: Իսկ «Էներգոինվեստ հոլդինգի» սեփականատերը  գործարար Սամվել Կարապետյանին ու նրա ընտանիքի անդամներին պատկանող «Տաշիր կապիտալ» ընկերությունն է: 

Այստեղ հարկ է հիշեցնել նաև այն, որ «Հայաստանի ներդրողների ակումբը», որի հետ համատեղ պետք է կառուցվի ՀԷԿ-ը,  ստեղծվել էր վարչապետ Կարեն Կարապետյանըի նախաձեռնությամբ ու Ռուսաստանի հայ գործարարների մասնակցությամբ՝ ի դեմս Սամվել Կարապետյանի: