Անկախ ՌԴ կամ ԱՄՆ հետ կապերից՝ ՀՀ-ն պաշտպանական հարցերում ինքնուրույն պետք է լինի. դեսպան

Հայաստանը կարող է պաշտպանական ամուր կապեր ունենալ ինչպես Միացյալ Նահանգների, այնպես էլ Ռուսաստանի հետ, սակայն կարեւոր է, որ Հայաստանն այս հարցերում որոշումներն ինքնուրույն ընդունի: Այս մասին լրագրողների հետ հանդիպման ժամանակ հայտարարել է Հայաստանում ԱՄՆ արտակարգ եւ լիազոր դեսպան Ռիչարդ Միլսը:

Դեսպանի խոսքով՝ այս ոլորտում Հայաստանի եւ ԱՄՆ-ի միջեւ համագործակցությունը վերջին տարիներին խորացել է: 

«Սա նաեւ այն մասին է վկայում, որ Հայաստանը ցանկանում է բոլոր հարեւանների հետ աշխատել եւ իր ավանդն ունենալ միջազգային անվտանգության ապահովման գործում: Լինելով ՀԱՊԿ անդամ երկիր՝ Հայաստանը ԱՄՆ-ի հետ ռազմական հարաբերություններ է զարգացնում եւ մասնակցում է ՆԱՏՕ-ի գործողություններին: Ինչպես բազմիցս ասել եմ, սա ոչ-ոքի արդյունքով խաղ չէ»,- ամփոփեց Ռիչարդ Միլսը:

News.am-ի հաղորդմամբ, ՀՀ Կոտայքի մարզի Արգել գյուղում «Լուսակերտ» ուսումնական կենտրոնի տարածքում հուլիսի 28-ին համատեղ հատուկ մարտավարական զորավարժություններ են տեղի ունեցել՝ Հայաստանի արտակարգ իրավիճակների նախարարության աշխատակիցների եւ նրանց բրիտանացի ու ամերիկացի գործընկերների մասնակցությամբ։ Զորավարժությունների թեման էր «Քիմիական, ճառագայթային մոնիթորինգի իրականացում, հրդեհը հանգցնելու եւ փրկարարական աշխատանքներ, ինչպես նաեւ քլոր տեղափոխող բեռնատարի եւ երկու ուղեւորատար գնացքների բախման հետեւանքով տուժածներին առաջին բժշկական օգնության ցուցաբերում»։