ՀՀ-ում գոհ են՝ 55 Մգվ արևային կայանի կառուցման մրցույթին մասնակցել են միջազգային հսկաներ

Այս կիսամյակում, համեմատած անցած կիսամյակի, առկա է էլեկտրաէներգիայի արտադրության 4,9 տոկոս աճ, ինչ վերաբերում է ներմուծմանը, ապա այն գրեթե նույնն է մնացել`1,8 տոկոսով է ավելացել: Կապված ռեժիմների հետ արտահանումն է փոքր-ինչ նվազել, բայց դա փոխհատուցվելու է մինչև տարեվերջ և նախարարության կանխատեսումներով՝ մինչև տարեվերջ առնվազն ունենալու ենք մինչև 20 տոկոս էլեկտրաէներգիայի արտահանման աճ: Այս մասին լրագրողների հետ հանդիպմանը հայտարարեց ՀՀ էներգետիկ ենթակառուցվածքների և բնական պաշարների նախարարի տեղակալ Հայկ Հարությունյանը:

Փոխնախարարի խոսքով, 2017-ի փետրվար-մարտ ամիսներին կարողացել են արտահանումն ավելացնել և ներմուծել են մայիս-հունիս ամիսներին և մինչև տարվա վերջ կրկնապատկվելու են փոխհոսքերի քանակը:.

«Կա փոխշահավետ համագործակցություն Վրաստանի հետ և հուսով ենք, որ դա շարունակական կլինի: Սա նախապատրաստական աշխատանք է հանդիսանում, հետագայում, երբ նոր գծերը կառուցվեն, ավելի լայն ծավալի առևտրի կանցնենք»,- ասաց նա:

Անդրադառնալով տեղական արևային վահանակների արտադրությանը, Հարությունյանը տեղեկացրեց, որ դրանք Հայաստանում արդեն հաջողությամբ իրականացվում են, բացի այդ՝ կան մի քանի այլ ներդրումային ծրագրեր ևս, որոնց նպատակն է հանրապետությունում վահանակների արտադրություն կազմակերպելը: Փոխնախարարի խոսքով՝ տեղական արտադրողների առաջարկած գները ոչ միայն մրցունակ են, այլև որոշ չափով ավելի քիչ են, քան ներկրվող արևային վահանակներով համակարգերի առաջարկը, ինչը նշանակում է, որ տեղական արտադրությամբ կարող ենք ավելի մատչելի դարձնել այդ տեխնոլոգիաների կիրառումը Հայաստանում, իսկ ստացված հավելյալ արժեքն էլ կմնա Հայաստանում:

«Տեղյակ եք, որ հայտարարվել է 55 Մգվ արևային կայանի կառուցման համար մրցույթ, ներկայացվել էր 20 դիմում, իսկ նախաորակավորման փուլն անցել է 10 կազմակերպություն: Մասնակցել են աշխարհահռչակ, խոշորագույն ընկերություններ և մեզ համար շատ դրական հաջողություն էր այն, որ կարողացանք հետաքրքրություն առաջացնել նման հսկա ընկերությունների շրջանում, որ մասնակցեն հայտարարված մրցույթին: Սա ցույց է տալիս այն, որ գործընթացը կազմակերպվել է արդյունավետ, ճիշտ սկզբունքներով և թափանցիկ»,- հավաստիացրեց Հարությունյանը՝ տեղեկացնելով, որ մրցույթը կավարտվի 2018 թվականի առաջին եռամսյակում: