CNN Turk-ի լրագրողը հրապարակել է Հայոց ցեղասպանության մասին հիշատակմամբ արխիվային նամակ

CNN Turk հեռուստաալիքի հաղորդավար Սերդար Քորուջուն թուրքական bianet.org կայքում հրապարակել է ունիկալ արխիվային փաստաթուղթ Հայոց ցեղասպանության մասին, որն առնչվում է Իրաքի Մոսուլ քաղաքին: Այս մասին գրում է Rusarminfo-ն:

«Թուրքական արխիվներում ես հայտնաբերել եմ ֆրանսերեն լեզվով մի նամակ, որը գրվել է 1919 թվականի հուլիսի 15-ին: Դրա վրա դրված է Կոստանդնուպոլիսի հայոց պատրիարքարանի պատասխանատու անձի, արքիեպիսկոպոս Զավեն Տեր-Եգանյանի (1869-1947) կնինքն ու ստորագրությունը», — գրել է լրագրողը՝ հրապարակելով նամակի լուսանկարը: 

Քորուջուի խոսքով, Զավեն Տեր-Եգանյանը նամակում տեղեկացնում է Էրզրումից հայկական ընտանիքին, որ իրենց հայրը՝ Կարապետ Գրիգոր Զարմանյանը, զոհվել է 1916 թվականին դեպի Մոսուլ բռնի տեղահանության ժամանակ: