Թուրքիայի պատգամավորներին արգելվեց հիշատակել Հայոց ցեղասպանության մասին

Թուրքիայի խորհրդարանն ընդունել է օրենք, որն արգելում է պատգամավորներին օգտագործել Հայոց ցեղասպանության կամ 1915 թվականի դեպքերի այլ, ոչ ընդունելի ձևակերպումներ: Այս մասին հաղորդում է թուրքական Т24 հեռուստաընկերությունը:

Փաստաթուղթը նաև արգելում է իրաքյան Քուրդիստան ձևակերպումը:

Թուրքիայի խորհրդարանի հայազգի ընդդիմադիր պատգամավոր Կարո Փայլանը ավելի վաղ հայտարարել էր, որ Էրդողանի հիմնած «Արդարություն և զարգացում» կուսակցության իշխանության գալու տարիներին Թուրքիայի հասարակությունը կարևոր քայլեր կատարեց անցյալի սխալների, կատարված մեղքերի ու հանցանքների մասին խոսելու հարցում: Նման օրենք ընդունելը նշանակում է վերադառնալ հին ժամանակներ:

«Այս ամենի նպատակն ընդդիմության ձայնը կտրելն ու նախագահական պալատից եկող հրամաններն ավելի արագ օրինականացնելն է: Հայոց ցեղասպանությունը պետք է քննարկվի ոչ թե օտար երկրների խորհրդարաններում, այլ հենց Թուրքիայի Մեջլիսում, քանի որ այդ հանցանքները տեղի են ունեցել Թուրքիայում և պետք է քննարկվեն Մեջլիսում»,- հայտարարել էր նա:

Ավելի վաղ տեղեկացրել էինք, որ Թուրքիայի իշխող «Արդարություն և զարգացում» կուսակցության և կոալիցիոն «Ազգային շարժում» կուսակցության կողմից պատրաստված և խորհրդարանում պատգամավորների վարքի, նիստերի կանոնակարգի ու արտաքին տեսքի հետ կապված փոփոխությունների 18 կետանոց փաթեթում տեղ է գտել նաև «Թուրք ժողովրդի պատմությունն ու Թուրքիայում ապրող ժողովուրդների ընդհանուր անցյալը վիրավորելու և մեղադրանքներ ներկայացնելու» պարագայում պատգամավորների՝ նիստերից ժամանակավոր հեռացման ու 12 հազ. թուրքական լիրայի չափով աշխատավարձից պահման մասին առաջարկը։