Լեհաստանը հեշտացրել է ՀՀ և ՌԴ քաղաքացիների աշխատանքի թույլտվություն ստանալու ընթացակարգը

Լեհաստանի Սեյմը (խորհրդարանի ներքին պալատը) ընդունել է մի օրինագիծ, որը նախատեսում է մի շարք պետությունների, այդ թվում՝ ՀՀ և ՌԴ քաղաքացիների աշխատանքի տեղավորման հեշտացված ընթացակարգ:

Նոր օրինագիծը, մասնավորապես, օտարերկրյա քաղաքացիներին հնարավորություն է ընձեռում աշխատանքի տեղավորվել հեշտացված ընթացակարգով: Այսինքն, այսուհետ զբաղվածությունը կարող է լինել սեզոնային (մինչև 8 ամսով), իսկ աշխատանքի թույլտվությունը տրամադրվելու է ամեն ադմինիստրատիվ համայնքի ղեկավարի կողմից: Մինչ այս աշխատանքի թույլտվություն հնարավոր էր ստանալ միայն երեք տարի ժամկետով և Լեհաստանի խոշորագույն ադմինիստրատիվ կենտրոնի ղեկավարի կողմից:  

Նշենք, որ բացի ՀՀ և ՌԴ քաղաքացիներից, նոր փոփոխությունները կվերաբերեն նաև Բելառուսի, Վրաստանի, Մոլդովայի և Ուկրաինայի քաղաքացիներին: