ՀՀ-ն պետք է ունենա հավասարակշռված հարաբերություններ ՌԴ-ի և ԵՄ-ի հետ. Ալավերդյան

Հայաստանի միայն մի կողմի վրա թեքված լինելը իրապես բացասական է ազդում պետության վրա: ՀՀ-ն պետք է ունենա հավասարակշռված հարաբերություններ ՌԴ-ի և ԵՄ-ի հետ: Այս մասին լրագրողների հետ հանդիպմանն ասել է «Ընդդեմ իրավական կամայականությունների» ՀԿ նախագահ, ՀՀ առաջին ՄԻՊ Լարիսա Ալավերդյանը: 

Նրա խոսքով, ՀՀ իշխանությունները միշտ կաշկանդված են գործում, դրա համար էլ կան լեգենդներ, թե Ռուսաստանն է ճնշում և այլն:

«Ես երբեք ՌԴ-ին չեմ մեղադրելու, քանի որ երկիր ունեմ, ունեմ իշխանություն ու իրենցից եմ պահանջում երկրի շահերին համապատասխան քաղաքականություն վարել: Իսկ ԵՄ-ն ունի պայմաններ, որին մենք ձգտում ենք և այս կոնտեքստում Սվիտալսկու հայտարարությանն արձագանքն ինձ համար առնվազն տարօրինակ էր: Ես հարգում եմ այն մարդկանց, ովքեր պատասխանել էին Սվիտալսկիին, բայց անհանգստացած եմ՝ արդյո՞ք քաղաքական ինչ-ինչ, ինձ համար կասկածելի նպատակների արդյունք չէր դա»,- հայտարարել Ալավերդյանը, անդրադառնալով ՀՀ-ում ԵՄ պատվիրակության ղեկավար Պյոտր Սվիտալսկու վերջին հայտարարությանը, որը ՀՀ իշխանությունների կողմից բուռն քննադատվեց: Ըստ Լարիսա Ալավերդյանի՝ նախատեսվում է ՀՀ-ԵՄ շրջանակային համաձայնագրի ստորագրում և այդ փաստաթղթի շուրջ նման խոսակցությունները կարող են բացասական մթնոլորտ ստեղծել: 

Հիշեցնենք, Սվիտալսկին նախորդ շաբաթ հայտարարել էր, թե ԿԸՀ-ն պետք է դարձնել ավելի արժանահավատ, վստահություն վայելող կառույց՝ փոխելով դրա կազմը, հայաստանյան իշխանությունները բավականին կոշտ էին արձագանքել: Այդպես, ՀՀ արդարադատության նախարար Դավիթ Հարությունյանն ասել էր, թե դա երկրի ներքին խնդիրն է, և այդ հարցը Ազգային ժողովն է որոշում, իսկ Պյոտր Սվիտալսկին փորձ է անում միջամտել Հայաստանի ներքին քաղաքականությանը:

Լարիսա Ալավերդյանը նաև պնդեց, որ ԵՄ պատվիրակության ղեկավարի խոսքում իրականում նորություն չկար՝ դրա մասին բոլորն էին խոսում, բայց ասողն է ավելի ազդեցիկ եղել: Եվ հայկական կողմը, ըստ էության, այդ հայտարարությունն այդքան ցավոտ է ընդունել նրա՝ ԵՄ դեսպանի բարձր դիրքի պատճառով: Ի վերջո՝ ակնհայտ է, որ Սվիտալսկին զուտ իր անձնական կարծիքը չի կարող ասել, դա նաև ԵՄ գնահատական է.

«Ես ափսոսում եմ, որ Հանրապետական կուսակցությունն իր մեջ չի գտել ուժ ընդունելու, որ այդ երևույթները կան և քայլեր ձեռնարկիելու դրանք հաղթահարելու համար»,- հավելել է բանախոսը: