Մինչև 2018թ. կլուծվի զոհված ազատամարտիկների և զինծառայողների ընտանիքների բնակարանի խնդիրը

Կառավարությունն այսօր հավանություն տվեց ՀՀ ոստիկանության «Ճանապարհային ոստիկանություն» ծառայության արտաբյուջետային ֆոնդի օգտագործման ուղղություն սահմանելու, ՀՀ 2017 թվականի պետական բյուջեում և ՀՀ կառավարության 2016 թվականի դեկտեմբերի 29-ի որոշման մեջ փոփոխություններ և լրացումներ կատարելու մասին որոշման նախագծին։

ՀՀ պաշտպանության նախարար Վիգեն Սարգսյանի ներկայացմամբ, այս նախագծի ընդունումը պայմանավորված է ՀՀ կառավարության կողմից հաստատված ծրագրով զոհված, մահացած ու հաշմանդամություն ունեցող զինծառայողների ընտանիքների բնակարանային պայմանների բարելավման նպատակով։

«Խոսքը տեղադրված տեսախցիկների միջոցով արտաբյուջե հավաքագրվող գումարների վերաբաշխումն է, որով մենք լուծում ենք զոհված ազատամարտիկների ու զինծառայողների անօթևան ընտանիքների բնակարանային խնդիրը, ինչպես նաև՝ առաջին կարգի հաշմանդամ զինծառայողների անօթևան և բարելավման կարիք ունեցող բնակարանային խնդիրը: Յուրաքանչյուր տարի բյուջետային ծրագրով այդ հարցը լուծում ենք 500 միլիոն դրամի շրջանակում», -ներկայացրեց նախարարը:

Փոփոխությունները համապատասխանում են ՀՀ նախագահ Սերժ Սարգսյանի հանձնարարականին, և մինչև տարվա վերջ բոլոր ընտանիքների բնակարանային խնդիրը լուծված է լինելու: Վիգեն Սարգսյանը նշեց, որ 2018 թվականին այս ծրագիրը կուղղվի II-րդ կարգի հաշմանդամություն ունեցող զինծառայողների խնդիրները լուծելու համար:

Վարչապետ Կարեն Կարապետյանը արձագանքեց հետևյալ կերպ. «Շատ լավ գործ է»: