Վաշինգտոնի ծեծկռտուքի մասին ԱՄՆ Հայ դատի գրասենյակի տնօրենը վկայություն կտա Կոնգրեսում

ԱՄՆ Հայ դատի գրասենյակի գործադիր տնօրեն Արամ Համբարյանը մայիսի 16-ին Վաշինգտոնում Թուրքիայի նախագահ Ռեջեփ Թայիփ Էրդողանի անվտանգության աշխատակիցների կողմից խաղաղ ցուցարարներին ծեծի ենթարկելու միջադեպի վերաբերյալ վկայություն է տալու Կոնգրեսի Ներկայացուցիչների պալատի արտաքին կապերի հարցերով հանձնաժողովում: Այս մասին հայտնում է Asbarez-ը:

Հայտնի է, որ Համբարյանն անձամբ է գտնվել դեպքի վայրում ու տեսանկարահանել Էրդողանի թիկնազորի գործողությունները: Համբարյանի ֆիքսած կադրերում երևում է՝ ինչպես են Էրդողանի թիկնապահներն իրավապահների աչքի առաջ ծեծում խաղաղ ցուցարարներին՝ տարեց տղամարդկանց ու մի քանի կնոջ, որոնք հարձակման հետևանքով արնաշաղախ գետնին են ընկել:

ԱՄՆ-ի Հայ Դատի հանձնախմբի գործադիր տնօրեն Արամ Համբարյանը նկարահանել է հարձակման մի մասը և տեղադրել հանձնախմբի ֆեյսբուքյան էջում: Արամ Համբարյանը նշել է, որ ԱՄՆ մայրաքաղաքում նմանատիպ ազգայնամոլական հարձակումն անսպասելի էր, թեև Թուրքիայում և այլ բռնատիրական երկրներում այդպիսի միջադեպերը սովորական բնույթ են կրում:

Նա ուշադրություն է հրավիրել այն հանգամանքի վրա, որ Էրդողանը, փաստորեն, փորձ է անում ԱՄՆ տեղափոխել իր երկրին բնորոշ անհանդուրժողականությունը:

Ավելի վաղ ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովը միաձայն ընդունել է թիվ 354 բանաձեւը՝ դատապարտելով մայիսի 16-­ին ԱՄՆ­-ում Թուրքիայի դեսպանի նստավայրի դիմաց Ռեջեփ Էրդողանի թիկնապահների կողմից խաղաղ ցուցարարների դեմ բռնությունը:

Բանաձեւով կոչ է արվում օրինազանցներին ենթարկել քրեական պատասխանատվության եւ քայլեր ձեռնարկել նման միջադեպերն ապագայում բացառելու համար:

«Ներկայացուցիչների պալատի արտաքին հարաբերությունների հանձնաժողովի կողմից այս բանաձեւի միաձայն ընդունումը նշանակում է, որ Թուրքիայի նախագահի՝ դաժանության բրենդն ԱՄՆ արտահանելու փորձերին ուժեղ հակազդում են միաժամանակ Հանրապետական եւ Դեմոկրատ կոնգրեսականները: Կոնգրեսը եւ նախագահ Թրամփի վարչակազմը պետք է կոշտ ուղերձ հղեն տեղի ունեցածին»,-­ ասել է ԱՄՆ Հայ դատի հանձնախմբի գործադիր տնօրեն Արամ Համբարյանը: