Յուրի Խաչատուրովի նշանակումը ինչպես դրական, այնպես էլ բացասական կողմեր ունի. ՊՆ

ՀԱՊԿ գլխավոր քարտուղարի պաշտոնում Հայաստանի ներկայացուցչի նշանակումը ինչպես դրական, այնպես էլ բացասական կողմեր ունի: Այս մասին ասուլիսում հայտարարեց ՀՀ պաշտպանության նախարար Վիգեն Սարգսյանը:

Նրա խոսքով, մի բան է, երբ հայտարարություն է անում ՌԴ քաղաքացին, այլ բան, երբ պոտենցիալ հայտարարությունը Հայաստանի քաղաքացունն է: Բայց, ավելացրեց նա, օբյեկտիվորեն Յուրի Խաչատուրովը գլխավոր քարտուղարի պաշտոնը ստանձնում է որպես միջազգային պաշտոնյա, այլ ոչ Հայաստանի քաղաքացի և հայտարարություններն էլ որոշակիորեն համաձայնեցվում են:

«ՀԱՊԿ-ը կարող է բազմաթիվ հարցեր լուծել: Հայաստանը կխորացնի հարաբերությունները կազմակերպության հետ, որպեսզի մեր երկրի անդամակցությունն առավելագույնս օգտակար և արդյունավետ լինի»,- հավելեց նախարար Սարգսյանը:

Հիշեցնենք, մայիսի 2-ից ՀԱՊԿ գլխավոր քարտուղարի պաշտոնը կստանձնի Յուրի Խաչատուրովը: Վերջինս 2016 թվականի հոկտեմբերի 3-ից զբաղեցնում էր ՀՀ ազգային անվտանգության խորհրդի քարտուղարի պաշտոնը, իսկ մինչ այդ գեներալ-գնդապետ Խաչատուրովը երկար տարիներ զբաղեցնում էր ՀՀ զինված ուժերի գլխավոր շտաբի պետի պաշտոնը: