Դաշնակցությունը հույս ունի, որ կոալիցիոն համագործակցությունը Հանրապետական կուսակցության հետ կշարունակվի: Լրագրողների հետ հանդիպմանն այսօր ԱԺ ՀՅԴ խմբակցության ղեկավար Արմեն Ռուստամյանը տեղեկացրեց, որ այս պահին երկու կուսակցությունների միջև ընթանում են քննարկումներ կոալիցիոն համագործակցության շարունակականությունն ապահովելու նպատակով:
Ըստ Ռուստամյանի՝ այդ համագործակցությունն անժամկետ էր, պայմանավորված չէր որևէ ձևաչափով, միակ խնդիրների լուծմամբ էր պայմանավորված, այնպես որ բոլոր հիմքերը կան այն շարունակելու համար: Առավել ևս, որ, ըստ պատգամավորի, որոշ խնդիրներ դեռ լուծված չեն և կոալիցիոն ձևաչափը այս իմաստով, թերևս, նաև արդարացված կլինի: «Դաշնակցության խնդիրն է շարունակել ամեն ինչ անել, որպեսզի հնարավոր լինի հասնել այդ հարցերի վերջական լուծմանը»,- ասաց նա:
ՀՅԴ-ն նաև գոհ է ապրիլի 2-ին կայացած խորհրդարանական ընտրություններում իրենց արձանագրած արդյունքներով: Հիշեցնենք, ըստ ԿԸՀ հրապարակած վերջնական արդյունքների, Դաշնակցությունը ստացել է 103 հազար 173 ընտրողի ձայն կամ 6.57 %: Անցողիկ շեմը՝ 5 % է: Ռուստամյանը, սակայն, արձանագրել է, որ նախորդ ընտրությունների համեմատ աճ են արձանագրել:
Վերադառնալով համագործակցության շուրջ բանակցություններին, դաշնակցական պատգամավորն ակնարկել է, թե դրանք չեն ենթադրում, որ կլինի համապատասխան ՀՅԴ նախարարական պորտֆելների կամ մարզպետների թվի ավելացում: «Խոսում ենք նոր ստեղծված իրավիճակում նոր որակով համագործակցության մասին, որովհետև համագործակցության մեկ տարվա փորձ ունենք, և սա լավ առիթ է հասկանալու՝ որքանով ենք կարողացել այդ համագործակցությունն ավելի արդյունավետ օգտագործել՝ ի շահ մեր պետության, և այդտեղ էլ անելիքներ կան»,-ասաց նա:
VERELQ-ի աղբյուրների համաձայն՝ ՀՅԴ-ն, այդուհանդերձ, այդ մասով տուժելու է, քանի որ խոսակցություններ կան, որ Արագածոտնի մարզը նորից տրվելու է ՀՀԿ-ական մարզպետի, ավելի ստույգ՝ նախկին մարզպետ Սարգիս Սահակյանին: Խոսակցություններ կան, որ բնապահպանության նախարարությունը ևս ՀՀԿ-ական հավակնորդներ ունի, սակայն ինչպես պորտֆելները կվերադասավորվեն դեռ վերջնական որոշում չկա: Հստակ է միայն, որ անգամ եթե թվի պակասեցում լինի, իշխանությունները Դաշնակցությանը կփոխհատուցեն այլ կերպ և այլ պաշտոններով՝ գուցե առաջին հայացքից ոչ այդքան յուղոտ, բայց դա միայն առաջին հայացքից:
Նշվում է, որ ՀՀԿ-ում այնպիսի տրամադրություններ են, որ կոալիցիոն համագործակցության ձևաչափը պետք է փոխվի. այո, հին ընկեր Դաշնակցությունը իրենը պետք է ստանա, բայց ոչ առաջնային պլանում, ինչպես եղել է մինչ օրս, այլ փոքր-ինչ ստվերային: Ապրիլի 2-ին կայացած ընտրությունների արդյունքները ոգևորել են ՀՀԿ-ականներին և բերել այն կարծիքի, թե այս անգամ լիիրված հնարավորություն են ստացել միանձնյա կառավարելու, առանց որևէ մեկի օգնության: Եվ այս մասին հասկացվել է ՀՅԴ-ին, որն էլ արդեն այսօր, Ռուստամյանի շուրթերով, ակնարկում է, որ հասկացել է՝ համագործակցությանը կողմ են, բանակցում են, բայց դրանց առանցքում ամենևին էլ մարզպետների թիվն ու նախարարական պորտֆելները չեն:
