Հայացք Մոսկվայից. ՌԴ–ի ու Իրանի հարաբերություններում «սեպ» խրելու փորձերը շատ վատ նշան են

ՌԴ–ն պետք է համոզի նախագահ Դոնալդ Թրամփի վարչակազմին, որ Իրանը լուրջ վտանգ չի ներկայացնում Վաշինգտոնի համար, եթե Մոսկվան ցանկանում է պահպանել Թեհրանի հետ դաշինքը։ Այդ մասին հայտարարել է ՌԴ ԳԱԱ Արևելագիտության ինստիտուտի Արաբական և իսլամական հետազոտությունների կենտրոնի ավագ գիտաշխատող Բորիս Դոլգովը։

Նա նշել է, որ մանրակրկիտ վերլուծության արդյունքում կարելի է տեսնել, որ Մոսկվայի ու Թեհրանի միջև առկա չեն դաշնակցային հարաբերություններ, փոխանցում է РИА Новости–ն։

Ըստ նրա, Իրանն ու ՌԴ–ը ունեն նույն դիրքորոշումը սիրիական հարցում, իսլամական ծայրահեղականության դեմ պայքարում, սակայն այդ հարաբերություններն այդքան խորը չեն, որ դրանք բնութագրվեն, որպես դաշնակցային։

Դաշնային Խորհդի պաշտպանության և անվտանգության հարցերով հանձնաժողովի ղեկավարի առաջին տեղակալ Ֆրանց Կլինցևիչը հայտարարել է, որ Թրամփը փոխել է որոշակի քաղաքական վեկտորներ, սակայն Կլինցևիչը չի բացառում, որ Մոսկվայի ու Թեհրանի միջև սեպ խրելու փորձեր լինելու են։ Նրա խոսքով, ՌԴ–ն և Իրանը ունեն ջերմ հարաբերություններ`այդ կապերը շատ կարևոր են, փոխանցում է riafan.ru կայքը։

Նա նշել է, որ Մոսկվայի համար կարևոր են թե Իրանի, թե ԱՄՆ–ի հետ լավ հարաբերությունները։

Կլինցևիչը հավելել է, որ Իրանի ու ՌԴ–ի հարաբերություններում սեպ խրելու մասին տեղեկությունները շատ մտահոգիչ են։