Մահացել է Կուբայի հեղեփոխության առաջնորդ Ֆիդել Կաստրոն
Կուբայի հեղափոխության առաջնորդ Ֆիդել Կաստրոն մահացել է 90 տարեկան հասակում: Այս մասին հայտարարել է Ֆիդելի եղբայրը, Կուբայի գործող ղեկավար Ռաուլ Կաստրոն:
«Կուբայի հեղափոխության առաջնորդ մահացավ ժամը 22.29-ին»,- հայտարարել է նա Կուբայի հեռուստատեսությամբ: Ֆիդել Կաստրոն Կուբայի ղեկավար էր դարձել 1959 թվականին, երբ իր առաջնորդած զինված հեղափոխությունը տապալեց ռազմական դիկտատոր Բատիստայի ռեժիմը: 2008 թվականին, հիվանդության պատճառով, Ֆիդելն իշխանությունը փոխանցեց իր եղբորը, Ռաուլին:
Ֆիդել Կաստրոն 20-րդ դարի ամենահայտնի քաղաքական դեմքերից մեկն է եւ ամենատպավորիչ հեղափոխություններից մեկի առաջնորդը: Նրա ղեկավարած հեղափոխության հետ է կապվում 20-րդ դարի մեկ այլ էպիկական կերպարի՝ Էռնեստո չէ Գեվարայի անունը, ով արգենտինացի երիտասարդ բժիշկ լինելով՝ հեծանիվով ճանապարհորդում էր Լատինական Ամերիկայում եւ Մեքսիկայում պատահաբար հանդիպում է Կուբայի հեղափոխականների խմբակին եւ Ֆիդելի խմբի հետ նավակով հասնելով Կուբա՝ դառնում է հեղափոխության առաջնորդներից մեկը:
Ֆիդելի հեղափոխությունից հետո Կուբան դարձավ սոցիալիստական միակուսակցական պետություն, որը սերտ կապեր հաստատեց Խորհրդային Միության հետ, ստանալով վերջինիս տնտեսական եւ քաղաքական աջակցությունը: Հենց այս սերտացումը կարող էր հանգեցնել Երրորդ համաշխարհային պատերազմի. 1962 թվականին ԽՍՀՄ առաջնորդ Նիկիտա Խրուշչովը որոշեց Կուբայում միջուկային մարտագլխիկներով հրթիռներ տեղադրել, ինչը ԱՄՆ-ի հետ քաղաքական հակամարտությունը վերածում էր միջուկային ռազմական կոնֆլիկտի: Այդ կոնֆլիկտը, սակայն, կասեցվեց պայթելուց թերեւս ժամեր առաջ. ԱՄՆ-ն համաձայնեց Թուրքիայից հանել իր միջուկային մարտագլխիկները եւ սրա դիմաց ԽՍՀՄ-ը նույնը արեց Կուբայում, հիշեցնում է armtimes.com-ը:
Կուբան ԽՍՀՄ փլուզումից հետո որոշակի տնտեսական դժվարություններ ուներ, բայց սոցիալիստական այս երկիրը կարողացավ վերապրել այս դժվար ժամանակաշրջանը, ինչի ամենամեծ արտահայտությունը դարձավ ԱՄՆ նախագահ Բարաք Օբամայի այս տարվա մարտին Կուբա կատարած պատմական այցը, որով պաշտոնապես ճեղքվեց 50-ամյա տնտեսական բլոկադան, որ ԱՄՆ-ն կիրառում էր Կուբայի նկատմամբ:
Ֆիդել Կաստրոն եւ Կուբան, անկախ տնտեսական վիճակից, հսկայական հեղինակություն են վայելում Լատինամերիկյան տարածաշրջանում, ետխորհրդային տարածքում. ԽՍՀՄ-ում, այդ թվում Խորհրդային Հայաստանում, Ֆիդել Կաստրոն այն կենդանի լեգենդներից էր, որի օրինակով դաստիարակվում էին սերունդներ:
