Ադրբեջանցի հրապարակախոս Ռաուֆ Միրկադիրովը քաղաքական ապաստան է խնդրել Շվեյցարիայում

Ադրբեջանցի հայտնի հրապարակախոս, «Զերկալո» թերթի տեսաբան Ռաուֆ Միրկադիրովը քաղաքական ապաստան է խնդրել Շվեյցարիայում։ Այս մասին Turan գործակալությանը հայտնել է փաստաբան Ֆուադ Ագաեւը։

Հիշեցնենք, որ Միրկադիրովին 6 տարով ազատազրկման էին դատապարտել պետական դավաճանության մեջ մեղադրանքով։ Իշխանությունները հավաստիացնում էին, որ Միրկադիրովին «հավաքագրել էր» իրավապաշտպան Լեյլա Յունուսը հայկական հետախուզության համար աշխատելու համար։

Այդ մեղադրանքը դատարանում չի հաստատվել, այդուհանդերձ լրագրողին 2014-ին դատապարտել էին ու նա գրեթե 2 տարի բանտում է անցկացրել, որից հետո միջազգային ուժեղ ճնշումների ներքո նրան պայմանական ազատ են արձակել։

Մինչեւ ձերբակալվելը Միրկադիրովը «Զերկալո» թերթի հատուկ թղթակիցն էր Թուրքիայում, որտեղ էլ հենց նրան ձերբակալել էին ու հանձնել Ադրբեջանին։ Ընդ որում նա ընտանիքը Թուրքիայում է մնացել, առանց գոյատեւման միջոցների։ Միջազգային իրավապաշտպան կազմակերպությունների ու Շվեյցարիայի իշխանությունների աջակցության շնորհիվ Միրկադիրովի կինն ու երեխաները ապաստան են ստացել Շվեյցարիայում։

Երեք ամիս առաջ Ադրբեջանի իշխանությունները թույլատրել են Ռաուֆ Միրկադիրովին այցելել ընտանիքին։ Լրագրողն ինքը իր որոշումը բացատրել է ընտանիքի հետ վերամիավորվելու ցանկությամբ ու հայրենիքում իր ազատությանն ու առողջությանը սպառնացող վտանգով, քանի որ նրա դեմ մեղադրանքը առայսօր չի հանվել։