Իրականում մենք երբեք էլ Արևմուտքից հեռու չենք եղել. Փաշինյան
Իրականում մենք երբեք էլ Արևմուտքից հեռու չենք եղել, որ հիմա մոտենանք, եթե նույնիսկ շատերը բերում են օրինակը, որ 2018 թ. ժողովրդական, ոչ բռնի, թավշյա հեղափոխությունից հետո Արևմուտքի հետ հարաբերությունները սերտացել են, հեղափոխությունից առաջ Հայաստանը և ԵՄ-ն ստորագրեցին համապարփակ և ընդլայնված գործընկերության մասին պայմանագիր: Այդ մասին բրիտանական լրատվամիջոցներին տված հարցազրույցում նշել է ՀՀ վարչապետ Նիկոլ Փաշինյանը:
«Այդ պայմանագիրը կյանքի կոչելու պատասխանատվությունն արդեն մեր կառավարության վրա ընկավ, իհարկե, նաև ժողովրդավարության ոլորտում մեր ունեցած ձեռքբերումները ստեղծեցին և ստեղծում են օբյեկտիվ պայմաններ` մեր հարաբերություններում դինամիկ զարգացում արձանագրելու, բայց ես նկատի ունեմ` եթե մի պահ ընթացիկ լրատվական հեղեղներից և հոսքերից դուրս գանք` ոչ մի անկանխատեսելի բան տեղի չի ունենում, եթե առավել ևս արձանագրենք, որ 2018 թ. հեղափոխությունից հետո մենա նաև ասել ենք, որ ժողովրդավարությունը մեզ համար հանգամանքների բերումով որդեգրած քաղաքականություն չէ, ռազմավարություն է», - նկատել է վարչապետը:
Փաշինյանը շեշտել է` կա նաև մեկ ուրիշ հանգամանք, որը էական է, և դա արտաքին հարաբերությունների և անվտանգային հարաբերությունների դիվերսիֆիկացումն է:
«Եթե շատ ուղիղ և անկեղծ ասեմ, դա ոչ թե պատճառ է, այլ հետևանք, որովհետև մենք արտաքին հարաբերությունները դիվերսիֆիկացնում ենք, բայց միայն մենք չէ, որ դիվերսիֆիկացնում ենք, այլ նույնիսկ նրանք, ովքեր մինչև 2022 թ. համարում էին, որ բավարար չափով դիվերսիֆիկացված են: Այո, մենք որոշակիորեն տեսնում ենք ԵՄ հետ հարաբերությունների մերձեցում, բայց իմ արձանագրմամբ` այստեղ արտառոց ոչինչ տեղի չի ունենում, դա մի կուրս է, որը ՀՀ-ն ամենևիօն էլ նոր չի որդեգրել»,- ասել է նա:
